'बेबी एबी' डी भिलियर्सका छोरा हुन् त ?

काठमाडौं । एबी डी भिलियर्स दक्षिण अफ्रीकाका लेजेण्ड क्रिकेटर हुन् । ३६० उपमा पाएका उनको समर्थक विश्वभर छन् ।

डी भिलियर्स सन् २००४ देखि सन् २०१८ सम्म अन्तर्राष्ट्रिय क्रिकेटमा सक्रिय रहे । उनको सन्यासपछि हाल दक्षिण अफ्रिकाका युवा खेलाडी डेवाल्ड ब्रेविस 'बेबी एबी' को नामले चर्चामा छन् ।

ब्रेविस गत संस्करणको यू-१९ विश्वकपबाट चर्चामा आउन थालेका हुन् । ब्रेविसले प्रतियोगितामा ६ खेलमा ५ सय ६ रन बनाउँदै सर्वाधिक रन बनाउने खेलाडी बनेका थिए । उनको यो रन विश्वकप संस्करणमा कुनै पनि खेलाडीले एक संस्करणमा बनाएको सर्वाधिक रन हो ।

प्रतियोगितामा श्रीलंकासँग पराजित भएको दक्षिण अफ्रीका प्लेअफबाट बाहिरिएको थियो ।

शानदार प्रदर्शनका कारण उनलाई लगत्तै भारतको इन्डियन प्रिमियर लिग (आईपीएल) मा मुम्बई इन्डियन्सले अनुबन्धन गरेको थियो ।

भारतमा जारी आईपीएलमा ब्रेविसले उत्कृष्ट प्रदर्शन गर्दै आएका छन् ।

ब्रेविसलाई यू-१९ विश्वकपमा दक्षिण अफ्रीकाका खेलाडीहरुले 'बेबी एबी' को उपनाम दिएका हुन् ।

ब्रेविसलाई 'बेबी एबी' भन्नुको एक कारण उनले लगाउने जर्सी नम्बर हो जुन पहिले एबी डी भिलीयर्सले लगाउने गर्थे । अर्को उनले ब्याटिङ गर्ने रचनात्मक शैली हो । ब्रेविसको ब्याटिङमा एबी डी भिलीयर्सको झल्को देख्न सकिन्छ ।

यस्तै सानोमा एबी डी भिलीयर्सले पढेको स्कुलमा ब्रेविसले समेत अध्ययन गरेका हुन् ।

एबी डी भिलीयर्सका दुई छोरा र एक छोरी छिन् । उनीहरु प्रतिस्पर्धात्मक क्रिकेट खेल्न निकै साना छन् ।