नेतृत्व गर्न कप्तान हुनैपर्छ भन्ने छैन–कोहली
काठमाडौं । भारतीय क्रिकेट टिमका पूर्व कप्तान विराट कोहलीले टिमको नेतृत्व गर्न कप्तान हुनै पर्ने आवश्यकता नरहेको बताएका छन् ।
एक अन्तरवार्ताका क्रममा कोहलीले भारतीय टिमको ब्याटिङको मुख्य आधारको रुपमा आफूले थप योगदान दिन सक्ने बताए ।
उनले केही समयको अन्तरालमै टी–ट्वान्टी तथा टेस्ट टिमको कप्तानी छाडे भने उनलाई एकदिवसिय टिमको कप्तानीबाट हटाइएको थियो ।
कोहलीलाई भारतीय टेस्ट टिमको एक सर्वाधिक सफल कप्तानको रुपमा लिइने गरिन्छ ।
तर उनले टेस्ट टिमको कप्तानी छाड्दा धेरैलाई आश्चर्यचकित पारेको थियो ।
कोहलीले सबै थोकका लागि एउटा समय र सिमा हुने गरेको तथा आफू त्यसप्रति सचेत रहेको बताए ।
उनले आफूले गर्नुपर्ने काम पुरा गरेको तथा थप हासिल गर्न अघि बढ्नुपरेको जनाए ।
कोहलीले ब्याट्सम्यानको रुपमा टिमलाई जित दिलाएर टिममा योगदान गर्न सक्ने तथा यसका लागि कप्तान हुनैपर्छ भन्ने नभएको बताए ।
