काठमाडौं । सन् २०१४ को टी- ट्वान्टी विश्वकपको सम्झना अझै पुरानो भएको छैन् ।
फाइनलमा श्रीलंकाले भारतलाई हराएर उपाधि जितेको थियो र त्यस श्रीलंकाली टिमका कप्तान थिए, लसिथ मलिंगा ।
यिनको नाम आएपछि लगतै सबैले फेरि सम्झने हो, उनको अनौठो न अनौठो बलिङ शैली ।
यसलाई अस्वभाविक भन्न त मिल्छ नै, तर यो सटिक भने थियो ।
बलिङ गर्ने बेला उनको हात उनको टाउको नजिक नभएर त्यसबाट टाढा हुने गर्थ्यो । यस्तो शैलीको फाइदा के भन्दा यसले निकै डरलाग्दो योर्कर सम्भव हुन्थ्यो ।
उनी कति धेरै घातक योर्कर फ्याल्थे भने त्यसका अगाडि ‘मै हुं’ भने ब्याट्सम्यानको पनि स्टम्प उड्यो, अथवा एलबीडब्लूको शिकार हुन्थ्यो । यिनै मलिंगाले हिजै जस्तो सबै खाले क्रिकेटबाट सन्यास लिएका छन् ।
यसका लागि एउटो भिडियो सन्देश पनि बनाएका छन्, जुन आफैमा निकै भावनात्मक छ । उनले यसका लागि चयन गरेका शब्द पनि खुबै साहित्यिक पाराका छन् ।
उनले भनेका छन्, ‘मेरा जुत्ताले अब आराम पाउने छन्, तर क्रिकेट प्रतिको मेरो माया अझ बढ्ने छ ।’ कम्ति लोभलाग्दो छैन्, उनको यो भनाइ ।
खासमा मलिंगा आधुनिक क्रिकेटका त्यस्ता बलर हुन्, जसले आफूलाई समय सुहाउने गरेर ढाले । त्यसैले त विश्व क्रिकेटको कान्छो स्वरूप ट्वान्टी ट्वान्टीमा खुबै जमे ।
अब त उनले यही ट्वान्टी ट्वान्टी क्रिकेट पनि खेल्ने छैनन् । उनले यसअघि नै टेस्ट र वान डे क्रिकेटबाट पनि सन्यास लिइसके । उनले १७ वर्ष भन्दा बढी अन्तर्राष्ट्रिय क्रिकेट खेले । अब उनी मैदानमा देखिने छैनन् ।
तर पूरापूर सम्भावना छ, उनको भूमिका मैदान बाहिर रहने नै छ । मूल प्रश्न, आखिरमा मलिंगाले किन सन्यास लिए त ? यसको उत्तर सायद सजिलो छ ।
उनी ३८ वर्षका भइसके, अब उनको शरीर पहिलो जस्तो रहेन् । उनको त्यही घातक बलिङ शैलीले उनको शरीरलाई छियाछिया जस्तै पारिसकेको थियो । चोटले उनलाई सक्दो दु:ख दिन थालेको थियो ।
–इन्डियन एक्सप्रेसको मद्दतमा ।
