काठमाडौं । नेपालका लेग स्पिनर सन्दीप लामिछाने पपुवा न्युगिनी (पीएनजी) विरुद्धको दोस्रो एकदिवसीय अन्तराष्ट्रिय खेलमा प्लेयर अफ दि म्याच चुनिएका छन् ।
ओमानको अल अमिरात क्रिकेट मैदानमा शुक्रबार नेपाललाई १ सय ५१ रनको जित दिलाउन किफायती बलिङ गरेका सन्दीप प्लेयर अफ दि म्याच चुनिएका हुन् ।
सन्दीपले पीएनजीको ६ विकेट लिएका थिए । जसमा सन्दीपले मात्र ११ रन खर्चिए ।
सन्दीपको यो करियरकै उत्कृष्ट बलिङ हो । यस अघि सन्दीपको ६ विकेट १६ रन उत्कृष्ट बलिङ फिगर रहेको थियो ।
सन्दीप लगातार दोस्रो खेलमा प्लेयर अफ दि म्याच चुनिएका हुन् ।
आईसीसी विश्वकप क्रिकेट लिग–२ अन्तर्गत ओमान र अमेरिकासँगको त्रिकोणात्मक एकदिवसीय सिरिज अघि नेपालले पीएनजीसँग सिरिज खेलेको हो ।
नेपालले सिरिजमा २-० ले क्लिन स्विप समेत गरेको छ ।
