सहमती जुटाउन थप प्रयास गरिने

काठमाडौं । फुटबल विवाद छानबिनका लागि राष्ट्रिय खेलकुद परिषद् (राखेप) द्वारा गठित समितिले प्रतिवेदन सार्वजनिक गर्नु अघि सहमतीको थप पहल गर्ने भएको छ ।

राखेपको निर्देशन अनुसार प्रतिवेदन तयार गरेको समितिले विवादका दुई मुख्य पात्रबीच सहमतीका लागि गृहकार्य गर्ने निष्कर्ष निकालेको छ ।

छानबिन सकेर प्रतिवेदन तयार पारेको समितिले दुवै पक्षलाई सहमतीमा ल्याउन केही दिन कोशिस गर्ने भएको छ ।

आगामी बुधबारसम्म दुवै पक्षलाई मिलाउन कोशिस गर्ने र सहमती हुन नसकेको अवस्थामा प्रतिवेदन सार्वजनिक गर्ने छानबिन समितिको तयारी छ ।

‘बयानका क्रममा दुवै पक्षले फुटबलको विकासका लागि समझदारी गरेर अघि बढ्ने प्रतिवद्धता जनाएका थिए । सोही अनुसार दुवै पक्षबीच सहमती जुटाएर प्रतिवेदन बुझाउने तयारी हो ।’ समितिका एक सदस्यले खेलपाटीसँग भने ।

राखेप सदस्य सचिव रमेशकुमार सिलवालले विवादलाई थप लम्ब्याउन नहुने भन्दै सहमतीको प्रयासलाई कायम राख्न सुझाव दिएका छन् । सोही अनुसार समितिले प्रतिवेदन बुझाउन र सार्वजनिक गर्न थप एक हप्ताको समय लिने भएको हो ।

समितिलाई प्रतिवेदन तयार गर्न एक साताको समय दिईएको थियो । तर समिति गठन भएर छानबिन थालेको दुई हप्ता बितिसकेको छ । समितिले विवादमा परेका दुवै पक्ष सहित प्रत्यक्ष÷अप्रत्यक्ष जोडिएका पात्रसंग बयान लगिसकेको छ । बयान र कागजातको अध्ययन गरेर समितिले प्रतिवेदन समेत तयार पारेको छ । तर राखेप फुटबल विवादलाई धेरै लम्ब्याउन नहुने पक्षमा देखिएको छ ।  

‘क्रिकेटको सामान्य विवादले निलम्बनसम्म पुग्यो । फुटबलमा समेत त्यही दोहरिन सक्छ । त्यसैले सदस्य सचिव सहमतीबाटै विवादको समाधान होस् भन्ने चाहनु भएको छ । सोही कारण समितिले केही दिन समय लिन चाहेको छ ।’ समितिका ती सदस्यले भने ।

राखेप दुवै पक्षबीच सहमती जुटाएर विवादको ‘सेफ ल्यान्डिङ’ गर्न चाहेको छ । तर विवादका दुई केन्द्रिय पात्रबीच सहमती जुट्न सकेको छैन ।

छानबिन समिति गठन भएपछि पूर्व प्रवक्ता किरण राईले दुवै पक्षबीच सहमती जुटाउने प्रयास गरेका थिए । तर राई सहित उपाध्यक्ष वीरबहादुर खड्का, सदस्य दावा लामा सहितको टिमले सहमती जुटाउने कोशिसले सार्थकता पाउन सकेन ।

सहमतीको प्रयासकै दौरान राखेपको छानबिन समितिले समानान्तर तरिकाबाट अनुसन्धान अघि बढाएको थियो । बयान सकेपछि समितिले समेत सहमतीको प्रयास गरेको थियो । तर शुक्रबारसम्म कुनै नतिजा निस्किएको छैन । शुभ–संकेत समेत देखिएको छैन ।

कार्यसमिति सदस्य किरण राईलेनै सहमतीको सम्भावना सकिएको संकेत गरेका छन् । उनले ‘चोचो मोचो’को समय गुज्रिसकेको बताउँछन् । 

‘एन्फामै मिलाउनुपर्ने विषय मन्त्रालय गुहार्ने काम गलत थियो । तर मन्त्रालयले छानविन समिति बनाएपछि प्रतिवेदन सार्वजनीक गर्नुपर्छ ।’ उनले भने, ‘मन्त्रालय र राखेप जस्तो नियमन गर्ने निकायमा पुर्याईसकेपछि नियम कानुन अनुसार हुनुपर्छ । अब प्रतिवेदनले सबै कुरा बोल्छ ।’

राईले राखेपले तयार पारेको छानबिन प्रतिवेदन चाँडै सार्वजनिक गर्न माग समेत गरेका छन् ।

मुख्य प्रशिक्षक अलमुताइरीले वरिष्ठ उपाध्यक्ष नेम्वाङ्गलाई कारण देखाउँदै पदबाट राजीनामा दिने घोषणा गरेपछि एन्फा विवाद उत्कर्षमा पुगेको थियो । दुवै जनाले घटनाको छानबिन गर्न एन्फामा निवेदन दिएका थिए ।

एन्फाको आकस्मिक कार्यसमिति बैठकले घटनाको उच्चस्तरीय छानबिनका लागि मन्त्रालयलाई आह्वान गरेको थियो । एन्फाको माग अनुसार मन्त्रालयले राखेपलाई घटनाको छानविन गरि सुझाव सहितको प्रतिवेदन पेश गर्न निर्देशन दिएको थियो ।