काठमाडौं । नेपाली खेलकुद पत्रकारहरुको छाता संगठन नेपाल खेलकुद पत्रकार मञ्च (एनएसजेएफ) ९७ औं विश्व खेलकुद पत्रकार दिवसका अवसरमा शुक्रबार भर्चुअल अन्तरक्रिया कार्यक्रमको आयोजना गरेको छ ।
दिवसका अवसरमा एनएसजेएफ एकेडेमीले ई–सेमिनारको आयोजना गरेर कोभिड–१९ को खेलकुदमा प्रभाव र स्वास्थ्यका दृष्टिकोणबाट टोकियो ओलम्पिकबारे कार्यक्रम सञ्चालन गरेको हो ।
सेमिनारको उद्घाटनमा एआईपीएसका अध्यक्ष जियानी मिर्लोले कोभिड–१९ को प्रभावसंग खेलकुद प्रतियोगितासंग पत्रकारको पहुँच घट्दै गएकोमा चिन्ता व्यक्त गरेका थिए । उनले खेल स्थलसँग पत्रकारको पहुँच घट्दै जानु खेलकुद पत्रकारका लागि चिन्ताको विषय रहेको बताए ।
ओलम्पिक कमिटिका अध्यक्ष जीवनराम श्रेष्ठले विश्व खेलकुद पत्रकार दिवसको शुभकामना दिनु हुँदै एनएसजेएफ एकेडेमीसँग सहकार्य गर्दै अघि बढ्ने प्रतिबद्धता व्यक्त गरे । उनले नेपालको ओलम्पिक मुभमेन्टमा खेलकुद पत्रकार मञ्चको योगदान रहेको उल्लेख गर्दै थप सहकार्य गर्दै अघि बढ्न चाहेको बताए ।
राष्ट्रिय खेलकुद परिषद् (राखेप)का सदस्य सचिव रमेशकुमार सिलवालले कोभिडले खेल क्षेत्रसंगै खेलकुद पत्रकारलाई समेत असर पारेको धारणा राखेका थिए । उनले खेल पत्रकारको क्षमता अभिवृद्धि गर्ने कार्यक्रममा मञ्चसंग यस वर्ष समेत सहकार्य गरिने बताए ।
नेपाल ओलम्पिक एकेडेमीको अध्यक्ष धुव्रबहादुर प्रधानले विश्व ओलम्पिक मुभमेन्टको विषयमा जानकारी गराएका थिए । नेपाल ओलम्पिक कमिटीका पूर्व अध्यक्ष समेत रहेका प्रधानले विश्वमा ओलम्पिक मुभमेन्टको सुरुवातबारे चर्चा गर्दै यसले खेलकुद मात्र नभएर विश्वमा भाइचारा अभिवृद्धि गर्न सहयोग पुगेको धारणा राखे । ओलम्पिक अभियानकै कारण विश्वमा शान्ति स्थापनामा महत्वपुर्ण योगदान पुगेको उनले बताए ।
सेमिनारमा नेपाल ओलम्पिक कमिटी मेडिकल कमिसनका अध्यक्ष डाक्टर सरोजकुमार श्रेष्ठले स्वास्थ्यका दृष्टिकोणले यस पटक ओलम्पिक प्रतियोगिता कसरी फरक रहन्छ भन्ने जानकारी गराएका थिए ।
कार्यक्रमको समापन गर्दै नेपाल खेलकुद पत्रकार मञ्चका अध्यक्ष दुर्गानाथ सुबेदी (देबेन्द्र)ले कोभिडको अवस्था सामान्य बन्दै चाँडै खेल मैदानमा भेट्न मिल्ने विश्वास व्यक्त गरे ।
-1736873565.JPG)
