सुनिल बल मछिन्द्रमा अनुबन्ध

काठमाडौं । सहिद स्मारक ए डिभिजन लिगको साविक विजेता मछिन्द्र फुटबल क्लबले राष्ट्रिय फुटबल टिमका मिडफिल्डर सुनिल बललाई नयाँ सिजनका लागि अनुबन्ध गरेको छ ।

साविक विजेता मछिन्द्रले पुराना खेलाडीलाई नविकरण गर्दै नयाँ खेलाडीमा सुनिललाई अनुबन्ध गरेको हो ।

‘यस बर्ष नयाँ खेलाडीको रुपमा सुनिल बल रहनेछन् । च्याम्पियन टिमका अधिकांश अनुहारले क्लबसंग सम्झौता नविकरण गरेका छन् ।’ क्लबका वरिष्ठ उपाध्यक्ष अनिल श्रेष्ठले खेलपाटीसंग भने ।

सुनिलले गत वर्ष ललितपुरको च्यासल युथ क्लबबाट खेलेका थिए । अब, सुनिलले पहिलो पटक मछिन्द्रको जर्सी लगाउने छन् । च्यासल अघि सुनिलले तीन पटकको लिग च्याम्पियन ललितपुरकै थ्रीस्टार क्लबबाट खेलेका थिए ।

मछिन्द्रले नयाँ सिजन च्याम्पियन बनेका खेलाडीलाई नविकरण गर्ने बताएको छ । पहिलो पटक सहिद स्मारक ए डिभिजन लिगको उपाधि हात पार्ने योजना सहित मछिन्द्रले पछिल्लो पटक मनाङ मर्स्याङ्दी क्लबका मुख्य खेलाडीलाई क्लबमा अनुबन्ध गरेको थियो ।

सोही अनुसार मछिन्द्रले लगानी अनुसार पहिलो पटक लिग उपाधि हात पार्न सफल भयो ।

‘गत सिजन लिग जितेकै खेलाडीलाई नविकरण गरेका छौं । केही खेलाडीको बाँकी रहेको छ ।’ श्रेष्ठले भने ।

क्लबले गत सिजन मछिन्द्रबाट खेलेका गोलरक्षक विशाल श्रेष्ठ, मिडफिल्डरद्वय सुजल श्रेष्ठ, विशाल राई, डिफेण्डर रन्जित धिमाल, देबेन्द्र तामाङ, स्ट्राइकर रेजिन सुब्बा, अभिषेक रिजालसंग सम्झौता नविकरण गरेको हो ।

मछिन्द्रका नियमित कप्तान तथा राष्ट्रिय टोलीका पूर्व कप्तान विराज महर्जनसंग भने सम्झौता हुन सकेको छैन । उनीसंग केही समयमा सम्झौता हुने क्लबले बताएको छ ।

हाल सिनियर र युवा स्टारलाई अनुबन्ध गरेको मछिन्द्रले विदेशी खेलाडी र बाँकी रहेका खेलाडी विस्तारै अनुबन्ध गर्दै लैजाने बताएको छ ।

सुनिलले गत जेठमा सम्पन्न फ्रेन्चाईज फुटबल नेपाल सुपर लिग (एनएसएल)मा विराटनगर सिटी एफसीबाट खेलेका थिए ।

एन्फाको पुरानै नियम अनुसार एक क्लबले चार विदेशी खेलाडी राख्न पाउनेछन् । जसमा एक दक्षिण एसियाली मुलका खेलाडी हुनुपर्नेछ ।

गत सिजन मछिन्द्रबाट खेलेका मिडफिल्डर एडेलाजा सोमिडे भने पुरानै क्लब मनाङ फर्किएका छन् ।

गत सिजन लिग जित्दा स्ट्राइकर अभिषेक रिजाल माल्दिभ्सको दोस्रो डिभिजन लिग खेल्न पुगेका थिए । उनको स्थानमा मछिन्द्रले अन्तिम खेलमा विमल घर्ति मगरलाई झिकाएको थियो ।

अन्तिम खेलमा त्रिभुवन आर्मी फुटबल क्लबलाई १–० गोल अन्तरले पराजित गर्दै मछिन्द्रले पहिलो पटक लिगको उपाधि हात पारेको थियो । अन्तिम खेलमा मछिन्द्रलाई जितको विकल्प थिएन भने आर्मीलाई बराबर काफि थियो । तर आत्माघाति गोलमा आर्मीलाई सिकार बनाउँदै मछिन्द्रले घरेलु फुटबलको नयाँ च्याम्पियन बनेको थियो ।

कोभिडका कारण गत वर्ष हुन नसकेको ए डिभिजन लिगलाई एन्फाले यस वर्ष निरन्तरता दिने भएको छ । एन्फाले असोज ३ गतेबाट ए डिभिजन लिग सुरु गर्ने निर्णय गरिसकेको छ । सोही अनुसार ए डिभिजन लिगका क्लबहरु लिगको तयारीमा जुटेका छन् ।