नेदरल्यान्ड्सलाई युक्रेनको चुनौती

एजेन्सी । १६ औं संस्करणको युरोकप फुटबलमा आज (आइतबार) राति नेदरल्यान्ड्स र युक्रेनबीच प्रतिस्पर्धा हुँदैछ ।

आम्स्टरडामस्थित जोहन क्रुफ एरिनामा नेदरल्यान्ड्स र युक्रेनले प्रतिस्पर्धा गर्ने छन् ।  घरेलु टिम र युक्रेनबीचको खेल राति १२:४५ बजे सुरु हुनेछ ।

बलियो टिम नेदरल्यान्ड्स घरेलु मैदानमा युक्रेनलाई हराएर सुखद सुरुवात गर्न चाहन्छ । पछिल्लो सात वर्षमा पहिलो पटक ठुला प्रतियोगिता खेलिरहेको नेदरल्यान्ड्स आफ्नो पुरानो शाख जोगाउन समेत चाहन्छ ।  

नेदरल्यान्ड्सले २०१६ को युरोकप र २०१८ को विश्वकप गुमाएको थियो । दुई ठुला प्रतियोगितामा नेदरल्यान्ड्स छनोट हुन असफल भएको थियो ।  समूह 'सी' मा रहेको नेदरल्यान्ड्सलाई भने यस पटक समूह विजेता टोलीको रुपमा हेरिएको छ ।

'हामीले युक्रेनको खेलको भिडियो हेरेका छौँ । उनीहरुको केहि खेलाडी म जान्दछु, उनीहरुले खेलेको हेरेको छु ,' डच टिमको प्रशिक्षक फ्रान्क डी भन्छन्, 'मलाई लाग्छ उनीहरु बलियो टिम हो । कठिन प्रतिद्वन्दी हो ।'

युक्रेनविरुद्ध डिफेन्डर म्याथिस डी लिग्टले नखेल्ने समेत प्रशिक्षक फ्रान्कले बताए । उनले मार्टिन आफ्नो पहिलो रोजाईको गोलकिपर रहेको बताए ।

युक्रेनविरुद्ध नेदरल्यान्ड्सको मुख्य हतियार मेम्पिस डिपे हुने छन् । उनले टिमको अग्रपंति सम्हाल्ने छन् ।

युक्रेनी टिम समूह चरण पार गर्ने लक्ष्यमा रहेको छ । त्यसैले युक्रेन पहिलो खेलमै नेदरल्यान्ड्सलाई स्तब्ध बनाउने योजनासहित मैदान उत्रने छ ।

'टिमको मुख्य कार्य भनेको समूह चरण पुग्नु हो । हामीलाई थाहा छ की हामीले धेरै कठिन टिम नेदरल्यान्ड्ससँग खेल्दै छौँ । हामी हाम्रो शैलीमा खेलिरहेका छौँ, हामी त्यसलाई परिवर्तन गर्दैनौं । हाम्रा आफ्नै सिद्धान्तहरू छन् जुन हामी पालना गर्दछौं,' युक्रेनी प्रशिक्षक एन्ड्री सेभचेन्कोले भने ।

दुई टिमबीच हालसम्म दुई खेल भएको छ । जसमा नेदरल्यान्ड्सले एक खेल जितेको छ । एक खेल १-१ गोलको बराबरीमा सकिएको छ ।