त्रिदेशीय फुटबल – एन्फाले दिन खाेजेका तीन सन्देश

काठमाडौं । नेपाल, बंगलादेश र किर्गिस्तान सम्मिलित त्रिदेशीय फुटबल काठमाडौंमा सुरु भएको छ । बिहिबार नेपालले आफ्नो पहिलो खेलमा किर्गिस्तानसंग प्रतिस्पर्धा गर्दैछ । पहिलो खेलमा बंगलादेशसंग पराजित किर्गिस्तानले दोस्रो खेलमा घरेलु टोलीसंग खेल्न लागेको हो ।

विश्वकप छनोटको खेल स्थगित बनेपछि अखिल नेपाल फुटबल संघ (एन्फा) चार देशीय फुटबल प्रतियोगिताको आयोजनामा जुटेको थियो । सुरुमा चार देशलाई सहभागी गराउने लक्ष्य थियो । तर सम्भव भएन । त्यसपछि तीन देशलाई समावेश गर्दै त्रिदेशीय प्रतियोगिताको घोषणा गरियो । फिफाले उपलब्ध गराएको समय अनुसार प्रतियोगिता सुरु भएको छ । अर्थात नतिजाले फिफा वरियतामा समेत प्रभाव पार्नेछ ।

चैतका लागि तय भएको विश्वकप छनोटका खेल स्थगित बन्ने बित्तिकै एन्फाले त्रिदेशीय फुटबल प्रतियोगिताको तयारी थालेको हो । घरेलु मैदानमा फुटबल प्रतियोगिता आयोजना गर्न एन्फासामु दबाब पनि थियो । प्रतियोगितामार्फत एन्फा मुख्य गरि तीन सन्देश दिन चाहन्छ ।

पहिलो – ७२ सालको भुकम्पपछि दशरथ रंगशाला क्षतीग्रस्त बन्यो । रंगशाला पुननिर्माणले निकै समय लियो । गत मंसिरमा साग खेलकुदको संघारमा मात्र रंगशाला बन्यो । राखेपले फुटबल सहितका खेलहरु रंगशालामा आयोजना गर्यो । लगत्तै कोरोनाले एक वर्ष घरेलु खेलकुद प्रभावित बन्यो । अर्थात विगत ६ वर्षदेखि एन्फाले दशरथ रंगशालामा फुटबल प्रतियोगिता आयोजना गर्न पाएको छैन ।

दशरथ रंगशाला नेपाली फुटबलको ‘मक्का’ जस्तै हो । तर राष्ट्रिय टिमलाई ६ वर्षदेखि रंगशाला बिरानो जस्तै छ । दशरथ रंगशालामा हजारौं दर्शकलाई साक्षी राखेर खेलाडीले खेल्न पाएका छैनन् । कर्माछिरिङ शेर्पा नेतृत्वको कार्यसमितिले दशरथ रंगशालामा राष्ट्रिय फुटबल टिमको एउटै कार्यक्रम गर्न पाएको छैन । भनिन्छ, जबसम्म रंगशालामा राष्ट्रिय टिमले फुटबल खेल्दैन, माहोल फर्कदैन । एन्फा अध्यक्ष शेर्पा त्यही फुटबलको माहोल त्रिदेशीय प्रतियाेगितामार्फत फर्काउन चाहन्छन् । कोरोनाले थलिएको घरेलु खेलकुदलाई त्रिदेशीय फुटबलमार्फत उर्जा भर्ने अवसरको रुपमा एन्फाले लिएको छ ।

दोस्रो – फुटबल खेल मात्र हैन, पैसा पनि हो । चुनाव जितेको झण्डै तीन वर्षमा एन्फाले रंगशालामा फुटबल खेलाउन पाएन । अर्थात टिकटमार्फत पैसा उठाउन पाएको छैन । एन्फाको मुख्य आयस्रोत फिफा र एएफसीको बजेट हो । आम्दानीको अर्को स्रोत भनेको दशरथ रंगशालामा टिकटबाट उठ्ने पैसा पनि हो । अन्तराष्ट्रिय फुटबल नहुँदा एन्फाले टिकटबाटको आम्दानी गर्न पाएको छैन । बिज्ञापन, प्रशारण अधिकारको रकम उठाउन पाएको छैन । त्यसैले अर्वौको बजेट चलाउने एन्फा पनि आर्थिक दबाबमा छ । फिफा, एएफसीको अनुदान शीर्षक बाहिर खर्च गर्न नपाउने । थप कार्यक्रम सञ्चालन गर्न बजेट नहुने ।

आम्दानी हुने अन्तराष्ट्रिय फुटबल एन्फाको वर्तमान कार्यसमितिले सञ्चालन गर्न पाएको थिएन । आन्तरिक स्रोतको व्यवस्थापन गर्न नसक्दा उमेर समुहको साफ फुटबलको घोषित पुरस्कार समेत एन्फाले दिन सकेको छैन । खेलाडीलाई घोषित पुरस्कार दिन नसक्दा एन्फाको बेलाबेलामा आलोचना हुने गरेको छ । एन्फा त्रिदेशीय फुटबल प्रतियोगिता आयोजना गरेर केही रकम बचत गर्न चाहन्छ । सो रकमबाट उधारो पुरस्कार तिर्न चाहन्छ ।

तेस्रो – दशरथ रंगशाला तयार नहुँदा नेपालले विश्वकप छनोटका खेल देश बाहिर गएर खेल्न पर्यो । कुवेतसंगको 'होम म्याच' भुटानमा खेल्यो । अष्ट्रेलिया, जोर्डन र चाइनिज ताईपेलाई घरमा आतिथ्यता दिने बेला कोरोना आईहाल्यो । अन्तराष्ट्रिय उडानको प्रतिबन्ध र क्वारेन्टिनको समयका कारण विश्वकप छनोटका खेल प्रभावित बनेका छन् । नेपालले घरेलु मैदानमा खेल्ने तीन खेल दशरथ रंगशालामा नहुने सम्भावना देखिएको छ ।

कुवेतमा हुने गरि नयाँ तालिका सार्वजनीक गरिएको छ । तर एन्फाले लत्तो छाडेको भने छैन । विश्वकप छनोटका बाँकी खेल दशरथ रंगशालामै गराउन एन्फा प्रयासरत देखिन्छ । त्रिदेशीय फुटबल आयोजना गरेर एन्फा विश्वकप छनोटका बाँकी खेल नेपालमै आयोजना गर्न सक्षम रहेको सन्देश दिन चाहन्छ । त्यसका लागि आन्तरिक लबिङ समेत एन्फाले जारी राखेको छ । त्रिदेशीय फुटबलको सफल आयोजना गरेर एन्फाले पुन विश्वकप छनोटका बाँकी खेल नेपालमै आयोजनाका लागि दाबी प्रस्तुत गर्न चाहेको छ ।