काठमाडौं । मनाङ मर्स्याङ्दी घरेलु फुटबलको लोकप्रिय क्लब हो । र उत्तिकै सफल पनि । तर पछिल्ला वर्ष घरेलु फुटबलमा मनाङको प्रर्दशन नाम अनुसारको छैन । कीर्तिमानी लिग उपाधि उचालेको मनाङमा स्टार खेलाडी देखिन छाडेका छन् । पछिल्लो सिजन मनाङले तेस्रो स्थानमा रहदै लिग टुङ्गायो ।
क्लबको व्यवस्थापन पक्षसंग असन्तुष्टि राख्दै बिशाल श्रेष्ठ सहितका स्टार खेलाडी मछिन्द्र लागेपछि मनाङ रित्तो बनेको थियो । राष्ट्रिय फुटबल टिमका अधिकांश खेलाडी मछिन्द्र लागेपछि लिगको संघारमा मनाङ कमजोर देखियो । मनाङबाट खेलाडी तान्न सफल मछिन्द्रले ऐतिहासिक पहिलो लिग उपाधि नै उचाल्यो ।
आखिर मनाङको टिम भनेकै स्टार खेलाडीको भिड हो । जहाँ राष्ट्रिय टोलीका अधिकांश अनुहार हेर्न पाईन्छ । त्यसैले मनाङ घरेलु फुटबलमा ‘शेर’ बनेको छ । तर आन्तरिक समस्याका कारण मनाङले पछिल्लो समय घरेलु फुटबलमा राम्रो गर्न सकेको छैन । मनाङलाई चिनाउन क्लब नै कमजोर बनेपछि मनाङ्गेहरुको मन कुँडिएको छ ।
क्लबलाई पुन पुरानै लयमा फर्काउने विश्वास सहित मनाङ मर्स्याङ्दीमा नयाँ टिम आएको छ । मुखिया गुरुङको नेतृत्वमा आएको नयाँ टिममा अधिकांश पदाधिकारी युवा छन् । एन्फाको केन्द्रिय सदस्य रहेका विजयी घले नयाँ टिमका निमार्णकर्ता हुन् । उनैले मुखियाको नेतृत्वमा मनाङको नयाँ टिम बनाएका छन् ।
बुझ्नुपर्ने कुरा, मनाङको कार्यसमिति गठन प्रक्रिया अन्य क्लब भन्दा फरक छ । उपल्लो मनाङका ७ वडाले दुई दुई जना प्रतिनिधि क्लबमा सिफारिस गर्छन् । तीनै सदस्यबाट क्लबको कार्यसमितिको गठन हुन्छ । कार्यसमितिको पदावधि दुई वर्षको हुन्छ । दुई वर्षको अन्तरमा पुन नयाँ कमिटि आउँछ । अहिले मुखियाको नेतृत्वमा नयाँ कमिटि आएको छ । कोरोनाले प्रभावित बनेको पछिल्ला वर्षमा मनाङले फुटबलमा राम्रो गर्न सकेन । नयाँ कार्यसमिति समक्ष मनाङलाई पुन पुरानै लयमा फर्काउने चुनौती छ । युवा टिम त्यसका लागि तयारपनि देखिन्छ ।
‘खेलाडीलाई पहिचान गरेर नयाँ खेलाडी कसरी लिने भन्ने सोचेका छौं । लक्ष्य राम्रै छ ।’ नयाँ कार्यसमितिको उद्धेश्यबारे मुखियाले भने ।
लजालु स्वभावका मुखिया थोरै बोल्छन् । तर मनाङलाई पुन नम्बर एकमा फर्काउने ईच्छाशक्ति उनको तिव्र देखिन्छ ।
‘हिजो के भयो त्यता तिर नफर्कौ । युवा खेलाडीले राम्रै नतिजा निकाल्यो । तेस्रो बन्यो । अब यसपाली जित्छ भन्ने आश छ ।’ उनी भन्छन् ।
खेलाडी भनेपछि हुरुक्कै हुने मुखिया क्लबमा पनि दिल खोलेर खर्च गर्ने अग्रपङ्तीमा आउँछन् ।
मनाङबाट काठमाडौं झरेपनि मनाङ्गेले फुटबलको माया मार्न सकेनन् । मस्र्याङ्दीलाई जोडेर फुटबल क्लब बनाए । त्यही क्लब मनाङ चिनाउने बिम्व बन्यो । हेर्दा लाग्छ, क्लबमार्फत मनाङ्गेहरु शहरमा आफ्नो पहिचान र फुटबलमा आफ्नो प्रभुत्व स्थापित गर्न चाहन्छन् ।
क्लबका नवनियुक्त महासचिव तेन्जिङ गुरुङ अब नयाँ तरिकाले क्लब अघि बढ्नुपर्ने धारणा राख्छन् ।
‘अब नयाँ तरिकाले जान पर्यो । युवा टिम छ । सोच्ने तरिका, सोच्ने तरिका फरक हुन्छ ।’ उनले भने, ‘अब समाज मात्र नभएर प्रशंसक र सरोकारवाला निकायलाई कसरी जोड्ने भनेर नयाँ तरिकाले जानुपर्छ ।’
तेन्जिङ नयाँ सोच सहित फुटबल विकासमा अघि बढ्नुपर्ने धारणा राख्छन् ।
घरेलु फुटबलमा मनाङ खर्चिलो क्लब मानिन्छ । क्लबको नियमित आम्दानीको स्रोत केही छैन । सहयोग रकम, चन्दा र प्रायोजक नै क्लबको मुख्य आम्दानी हो । खेलाडी अनुबन्धनमा दिल खोलेर पैसा खर्च गर्ने मनाङको चरित्र हो । क्लबको नियमित आयस्रोत जुटाउने चुनौती मनाङसामु छ । दीर्घकालीन रणनीति बनाएर क्लबअघि बढ्नुपर्ने मनाङकै पुर्व पदाधिकारी बताउँछन् ।
क्लबका निवर्तमान अध्यक्ष छिमी उर्गेन गुरुङ पछिल्ला दुई वर्षको कार्यकालबाट सन्तुष्ट देखिन्छन् ।
कोरोनाका कारण घरेलु फुटबल प्रभावित बनेपनि पहिलो सिजन राम्रै नतिजा आत्मसाथ गरेको उनी बताउँछन् ।
‘राम्रो टिम पाएको थिए । टिममा युवाहरु थिए । एकवर्ष एफसी कप खेल्ने मौका पायौं । तयारी नभएपनि लिगमा तेस्रो बन्यौ । मोफसलमा पनि राम्रो नतिजा निस्कियो ।’ उनी भन्छन् ।
गुरुङ नियम संशोधन गरेर क्लबको कार्यसमितिलाई पर्याप्त समय दिनुपर्ने राय व्यक्त गर्छन् । ‘यो सामाजिक काम हो । तर प्राप्त दुई वर्षमा योजना बनाएर कार्यान्वयन गर्न निकै गाह्रो हुन्छ । यसमा गम्भिर बन्न आवश्यक छ ।’ उनले भने ।
-1734879364.jpg)
-1734875597.jpg)
