काठमाडौं । २३ वर्ष अघि सामाजिक कार्यको लागि स्थापना भएको थियो सातदोबाटो युवा क्लब ।
सुरुवाती समयमा सामाजिक कार्य गरेपनि ललितपुरे क्लबले खेलकुदमा हात हाल्यो । कारण थियो, क्लबका सदस्यमा फुटबल प्रतिको मोह ।
क्लबका सदस्यहरु फुटबलका लागि भोका, प्यासी थिए । त्यहि कारण सातदोबाटोले सामाजिक कार्यसँगै फुटबललाई पनि अगाडी बढाउने निर्णय गर्यो । र, सातदोबाटोले २०५४ सालमा सी डिभिजन छनोट खेल्दै फुटबलको यात्रा सुरु गर्यो ।
स्थापनाको २३ वर्षपछि भने सातदोबाटो व्यवसायिक फुटबलको नयाँ उचाईमा पुगेको छ । अर्थात्, सातदोबाटो नेपाली फुटबलकै शीर्ष लिग सहिद समरक 'ए' डिभिजन लिगमा बढुवा भएको छ ।
एन्फा कम्प्लेक्स सातदोबाटोमा जारी सहिद स्मारक 'बी' डिभिजन लिगमा दुई खेल अगाबै सातदोबाटो बढुवा भएको हो । अबको सिजन सातदोबाटोले शीर्ष डिभिजनको लिग खेल्नेछ ।
फुटबल सुरुवात गर्दाबाटै सातदोबाटोले शीर्ष लिग खेल्ने योजना बनाएको थियो । तर, सातदोबाटोले २३ वर्षमा आफ्नो योजना पूरा गर्याे ।
सातदोबाटोले 'बी' लिग खेल्न निकैनै मेहनत गर्नुपर्याे । उसले २ वर्ष 'सी' छनोटमै संघर्ष गर्याे । ५६ सालमा 'सी' डिभिजनमा बढुवा भएको सातदोबाटो त्यसको एक दशकपछि 'बी' डिभिजनमा बढुवा भएको थियो । ६६ सालमा 'बी' डिभिजन बढुवा भएको सातदोबाटोले ११ वर्षको अन्तरालमा 'ए' डिभिजनमा आफुलाई उभ्याउन सफल भयो ।
'बी' डिभिजनमा उक्लिएसंगै सातदोबाटोले 'ए' डिभिजन लिगलाई मुख्य प्राथमिकता बनायो । तर, विविध कारण सातदोबाटोले 'ए' डिभिजनमा उक्लन लामै समय कुर्नु पर्यो ।
‘बी डिभिजनमा उक्लिए लगत्तै हाम्रो लक्ष्य नै 'ए' डिभिजनमा उक्लने थियो । सोहि अनुसार तयारी र योजना गरिरहेको थियौं । हरेक वर्ष हामीले बी डिभिजन खेल्दा एउटै स्तरको मेहनत र योजना ल्याएका थियौं । त्यसमा खेलाडी र ब्यवस्थापकीय सबैको उत्तिकै मेहनत छ । जसले गर्दा हामी सफल भयौं,’ ६ वर्षयता क्लबको अध्यक्षता गरिरहेका कपिल राना मगर बताउँछन् ।
यस पटक भने विगत ३ वर्षदेखि क्लबमै रहेका खेलाडीको मेहनत र क्लबको चुस्त ब्यबस्थापकीय भूमिकाले क्लबलाई शीर्ष डिभिजनमा उकाल्न सफल रह्यो ।
‘हाम्रो खेलाडी सबै तीन सिजन यता हामीसँगै छन् । खेलाडीसँग हामी राम्रोसँग भिज्न पाएका छौं । खेलाडी र प्रशिक्षकको तालमेल पनि राम्रो रह्यो । एउटा वर्ष केहि कमजोरी भए अर्काे वर्ष त्यसलाई सुधार गर्यौ । दाताहरुबाट पनि राम्रो सहयोग भयो । जसका कारण हामीले यो उचाई पायौं,’ अध्यक्ष कपिलले भने ।
'बी' लिगमा उत्कृष्ट खेलेको सातदोबाटोले दुई खेल अगाबै आफुलाई च्याम्पियन बनाएको थियो । त्यो पनि आफु मैदान बाहिर रहँदै ।
सातदोबाटो 'ए' डिभिजनमा बढुवा हुँदै गर्दा उसका खेलाडी र अफिसियलले घरमै थिए । सातदोबाटोलाई लिग उपाधि हात पार्न कम्तिमा एक जितको आवश्यकता थियो । तर, दोस्रो स्थानमा रहेको खुमलटार युथ क्लब श्री भगवती क्लबसँग २–१ गोल अन्तरले पराजित भएपछि सातदोबाटो च्याम्पियन बनेको थियो ।
तर, सातदोबाटोको अपराजित रहँदै ए डिभिजनमा उक्लने योजना भने सफल हुन पाएन । च्याम्पियन भएको तेस्रो दिननै सातदोबाटो मध्यपुर युथ एसोसियनसँग २–१ गोल अन्तरले पराजित भयो । प्रतियोगितामा १० खेल खेल्दा १६ गोल गरेर ६ गोल व्यहोरेको सातदोबाटोको २५ अंक छ ।
अबको चुनौती
'ए' डिभिजनमा बढुवा भएसँगै सातदोबाटोलाई ठुलो चुनौती समेत आइलागेको छ । बढुवासँगै सातदोबाटोले अब आफुलाई व्यवसायिक फुटबलतर्फ ढल्काउनु पर्नेछ ।
सातदोबाटोले अब एसियाली फुटबल महासंघ (एएफसी) को मापदण्डमा रहेर काम गर्नुपर्नेछ । सातदोबाटोले अब होम मैदान, आफ्नै भवन, आफ्नै एकेडेमी, वर्षैभरी खेलाडी सम्झौतामा राख्नुपर्ने लगायतका नियमहरु पालना गर्नुपर्नेछ । सातदोबाटो त्यो चुनौतीको सामना गर्न तयार समेत छ ।
‘ए डिभिजनमा गएपछि योजना पनि ठुलो चाहिन्छ । अब गोदावरीमा मैदान बनाउन हेर्दैछौं । भवन हाम्रो आफ्नै छ,’ अध्यक्ष कपिल भन्छन्, ‘अब धेरै परिवर्तन हुनुपर्छ । एकेडेमी संचालन गर्नुछ । आर्थिक भार बढ्छ । त्यसलाई सुधार गर्नुछ । आर्थिक भार 'ए' मा बढि हुन्छ । त्यसको तयार थाल्छौं । केहि दाताहरु हुनुहुन्छ जस्ले 'ए' मा उक्लिएपछि झनै समर्थन गर्नुहुन्छ ।’
सातदोबाटो 'ए' मा उक्लिएसँगै अब ललितपुरबाट शीर्ष लिग खेल्ने ६ क्लब भएका छन् । थ्रीस्टार क्लब, जावलाखेल युथ क्लब, ब्रिगेड ब्वाईज क्लब, फ्रेन्ड्स क्लब र च्यासल युथ क्लबकाबीच आफुलाई उत्कृष्ट बनाउनु सातदोबाटोलाई चुनौती समेत रहेको छ ।
‘पक्कै पनि क्लबले अब यस विषयमा सोच्नुपर्ने हुन्छ । हामी 'ए' मा टिक्न भन्दा पनि टप सिक्समा रहँन लिग खेल्छौं । आर्थिक स्रोत कसरी जुटाउने त्यसका केन्द्रित छौं । त्यो आजलाई मात्रै हैन ।दीर्घकालीन रुपमा यसलाई अगाडी बढाउनु छ,’ अध्यक्ष कपिल भन्छन् ।
मेहनतले सफल
सातदोबाटोलाई पछिल्लो तीन वर्ष प्रशिक्षण गराईरहेका प्रशिक्षक हुन् सनोज श्रेष्ठ । उनले तेस्रो अवसरमा भने क्लबलाई 'ए' डिभिजनमा बढुवा गराउन सफल भए ।
सातदोबाटोको सफलताका पछाडी खेलाडीको मेहनत र क्लबले ब्यवस्थापनमा देखाएको साहस नै प्रमुख रहेको उनी बताउछन् ।
‘सबैको मेहनत थियो । खेलाडी, ब्यवस्थापक सबैले उत्तिकै मेहनत गर्दा यो नतिजा हासिल गरेका छौ । टिम वर्क धेरै राम्रो भयो । हाम्रो लक्ष्यनै 'ए' डिभिजन थियो । त्यसमा सफल भएका छौं,’ नेपाल यू–१६ राष्ट्रिय टोलीका पूर्व प्रशिक्षक समेत रहेका सनोजले भने ।
सनोज ललितपुरकै अर्काे 'ए' डिभिजन क्लब ब्रिगेड ब्वाईजसँग समेत आबद्ध छन् । तर, अब दुबै क्लबसँगको समन्वयमा आफु एक क्लबमा मात्र रहने सनोज बताउँछन् ।
आमासँग खुसीको आँशु
शनिबार टोली च्याम्पियन हुँदा सातदोबाटोका कप्तान बसन्त तामाङ आमासँग घरमै थिए । मध्यपुरसँगको खेल अघि आराम समय पाएर आमासँग गफिँदै बसेका बसन्तलाई टिम ब्यवस्थापक रविन खड्काले फोन गरे । उनले भने ‘टोली च्याम्पियन भयो ।’
‘मैले खेल (श्री भगवतीविरुद्ध खुमलटार) हेरेको थिईन् । म्यानेजर (रविन खड्का) बाट फोन आयो । अनि थाहा पाए च्याम्पियन भएको । आमासँग खुसीको आँशु साटे,’ च्याम्पियन हुँदाको आफ्नो अनुभव कप्तान बसन्तले सुनाए ।
विगत ५ वर्षयता बसन्त क्लबसँगै रहेका छन् । उनले ३ सिजन क्लबको कप्तानी गरिरहेका छन् ।
अघिल्लो सिजन एनआरटीसँग हार्दै बढुवाबाट चुक्न परेको बताउदै बसन्तले त्यहिँ हारको पाठले यस उपलब्धि हासिल गरेको बताउँछन् ।
‘एनआरटीसँग हार्दा हाम्रो जिन्दगीकै सबैभन्दा ठुलो हार थियो । धेरै मेहनत थियो । त्यो मेहनत अहिले पनि जारी रह्यो । जसका कारण यो सफलता हासिल गरेका छौँ,’ टिमका मुख्य डिफेन्डर समेत रहेका बसन्त भन्छन् ।
यस्तै बसन्तले शीर्ष डिभिजन खेल्न अहिलेको मेहनतले नपुग्ने बताए । ‘यो मेहनतले 'ए' मा खेल्न गाह्रो हुन्छ । मेहनत धेरै खाचो हुन्छ । मनाङ थ्रीस्टारमा रहेका खेलाडी जस्तो बन्न धेरै गाह्रो छ । हामी मेहनत गर्छाैं । केहि नयाँ खेलाडी हुन्छन् नै त्यसकै सहायतामा हामी 'ए' खेल्छौं,’ उनले भने ।
-1734879364.jpg)
-1734875597.jpg)
