गण्डकी र थ्री स्टार क्वाटरफाइनलमा

काठमाडौं । गण्डकी प्रदेश र थ्री स्टार एकेडेमी राजधानीमा जारी पाँचौ ढोरपाटन एम–१५० राष्ट्रिय खुला पुरुष भलिबल प्रतियोगिताको क्वाटरफाइनलमा प्रवेश गरेका छन् ।

गण्डकी समूह ‘डी’ को विजेता तथा थ्री स्टार एकेडेमी समूह ‘सी’ को विजेताको रुपमा अन्तिम आठमा पुग्न सफल भएको हो ।

ढोरपाटन क्लबको खेल मैदानमा मंगलबार गण्डकीले समूह चरणको अन्तिम खेलमा पाल्पालाई ३–० को सोझो सेटमा पराजित गर्दै समूह विजेता बन्यो । जितसंगै गण्डकी समूहमा तीन खेलबाट ९ अंक जोड्यो । यो समूहबाट एक टोलीको टुङ्गो लाग्न बाँकी छ ।

मंगलबारै थ्री स्टारले समूह चरणको अन्तिम खेलमा सुर्यदीप कलेजलाई २५–१६, २५–१३ र २५–१५ ले पराजित गर्दै समूह विजेताको रुपमा अन्तिम आठमा स्थान पक्का गर्यो । 

यस्तै मंगलबार भएको पहिलो खेलमा पाल्पाले धादिङमाथि २५–८, २५–११ र २५–८ को सहज जित निकालेको थियो । तर, आफ्नो दोस्रो खेलमा जित निकाल्न सकेन ।

यो समूहबाट चितवन टाइगर र पाल्पामध्ये एक टिमले अन्तिम आठमा स्थान बनाउनेछ । त्यस्तै वडिगार्ड गाउपालिकाले सुर्योदय क्लबमाथि ३–१ को जित निकाल्यो ।