ब्राइटनलाई हराउँदै लेष्टर दोस्रो स्थानमा

एजेन्सी । इंग्लिस प्रिमियर लिग फुटबलमा लेष्टर सिटीले जित निकालेको छ ।

शनिबार राति भएको खेलमा लेष्टरले ब्राइटनलाई २-१ गोल अन्तरले पराजित गरेको हो ।

ब्राइटनको मैदानमा लेष्टरलाई जित दिलाउन केलिची इहानाचो र डानिल अमर्टेले एक एक गोल गरे ।

ब्राइटनका एडम लालनाले एक गोल फर्काए ।

खेलको दशौँ मिनेटमा लालनाले गोल गर्दै ब्राइटनलाई अग्रता दिलाएका थिए ।

तर, खेलको ६२ औं मिनेटमा केलिचीले गोल गर्दै लेष्टरलाई १-१ गोलको बराबरीमा ल्याए ।

त्यसपछि खेलको ८७ औं मिनेटमा डानिलले गोल गर्दै लेष्टरलाई २-१ को जित दिलाए ।

जितसँगै लेष्टर लिगको दोस्रो स्थानमा उक्लिएको छ ।

लेष्टरले २८ खेलमा ५३ अंक जोडेको छ ।

ब्राइटन २६ अनक जोडेर १६ औं स्थानमा रहेको छ ।