आर्मीविरुद्ध एपीएफलाई अग्रता

काठमाडौं । राष्ट्रिय महिला लिग फुटबलमा अहिले साविक विजेता एपीएफले त्रिभुवन आर्मी क्लबसँग प्रतिस्पर्धा गरिरहेको छ ।

सातदोबाटोस्थित एन्फा कम्प्लेक्समा जारी खेलको पहिलो हाफ सकिदा एपीएफले २-० को अग्रता बनाएको छ ।

एपीएफका लागि खेलको २७ औं मिनेटमा अन्जली कुमारी योन्जनले गोल गरिन् ।

साबित्रा भण्डारीले मिलाएको पासमा अन्जली बायाँ खुट्टाले दोस्रो बारमा आकर्षण गोल गरिन् ।

यस्तै पहिलो हाफको इन्जुरी समयमा सरु लिम्बुले गोल गर्दै एपीएफलाई २-० को अग्रता दिलाएकी छिन् ।

सरुले पनि साबित्राको पासलाई सदुपयोग गरिन् ।

आज एपीएफ लगातार तेस्रो जित निकाल्ने लक्ष्यमा रहेको छ ।

पहिलो खेलमा एपीएफले चन्द्रपुर नगरपालिकालाई ६-० ले हराएको थियो ।

दोस्रो खेलमा एपीएफले विराटनगर महानगरपालिकालाई ७-० ले हराएको थियो ।

एपीएफ २ खेलमा ६ अंक जोडेर शीर्ष स्थानमा रहेको छ ।

आर्मी दोस्रो जितको खोजीमा हुनेछ ।

पहिलो खेलमा पुलिससँग गोलरहित बराबरी खेलेको आर्मीले दोस्रो खेलमा वालिङलाई ७-० ले हराएको थियो ।

आर्मी २ खेलमा ४ अंक जोडेर दोस्रो स्थानमा रहेको छ ।