काठमाडौं । राष्ट्रिय खेलकुद परिषद्का सदस्य सचिव केशव कुमार विष्टले एशियन गेम्समा नेपालको खराब प्रर्दशनको बचाउ गरेका छन् । काठमाडौमा आईतबार आयोजित कार्यक्रममा सदस्य सचिव विष्टले देशको हैसियत अनुसारनै पदक आउने भन्दै नकारात्मक आलोचना नगर्न सुझाव दिए ।
एशियन गेम्समा नेपालले पदकको दाबी गरेको कराँते, तेक्वान्दो र उशु लगायतका खेलबाट शुन्य हात फर्कनु परेपछि राखेपको चर्को आलोचना भएको छ । पदक किन नआएको भन्दै पत्रकारहरुले बारम्बार प्रश्न गरेको उल्लेख गर्दै सदस्य सचिव विष्टले नेपालका पत्रकार समेत कोरिया र जापानको जस्तो किन नभएको भन्दै प्रतिप्रश्न गरे ।
‘अरु देशको जस्तो पदक किन आएन भन्ने पत्रकारको प्रश्न आईरहेको छ । त्यसो भए हाम्रोमा जापान, कोरियाको जस्तो पत्रकार किन नभएको त ?’ विष्टले प्रतिप्रश्न गरे, ‘जस्तो रुख हुन्छ । उस्तै फल्ने हो ।’
उनले नेपाल सानो देश भएको र बजेट समेत थेरै हुदाँ प्रतियोगितामा राम्रो गर्न नसकिएको जिकिर गरे ।
एशियाडमा खेल र खेलाडी संख्या धेरै सहभागि गराउने निर्णयको बचाउ गर्दै सदस्य सचिव विष्टले बजेटको व्यवस्था भए थप खेलाडी प्रतियोगितामा आफुले सहभागि गराउने मनसाय बनाएको बताए ।
‘एउटा खेलाडीले एशियाडमा खेल्ने सपना राखेर खेलमा जिवन समर्पण गरेको हुन्छ । त्यसमा राज्यले थोरै पैसा हाल्दैमा देश गरिब हुदैन । खेलाडीहरुको जन्ति लग्यो भनेर कसैले रिस नगरे हुन्छ । खेलाडीका हरेक कुरामा खर्च गरिन्छ ।’ विष्टले भने ।
सदस्य सचिव विष्टले सबै खेलाडी र सबै खेललाई समावेश गर्दा एशियन गेम्समा जाने टोली ‘जम्बा’े बन्न गएको बताए ।
‘कसैले जन्ती लग्यो भनेका छन् । कसैले पिकनिक गयो भनेका छन् । कसैले बुढी लग्यो भनेका लेखेका छन् ।’ सञ्चारमाध्यममा आएका समाचारको प्रतिवाद गर्दै विष्टले भने, ‘अर्काकी बुढी पो लिन भएन, आफ्नी बुढी नि लिन नपाउने ? सोध्नु छैन ।’
सदस्य सचिव विष्टले आफुले श्रीमतीलाई व्यक्तिगत खर्चमा एशियाडमा सहभागि गराएको दाबी गरे ।
