एजेन्सी । नेपाली लेग स्पिनर सन्दीप लामिछाने विश्वमा नेपाली क्रिकेटका ग्लोबल आइकनको रुपमा स्थापित छन् ।
सन्दीपले सानै उमेरमा विश्वका ठुला ठुला टी-ट्वान्टी फ्रेन्चाइज क्रिकेट लिग खेलिसकेका छन् । सन्दीप विदेशी फ्रेन्चाइज खेल्ने पहिलो नेपाली समेत हुन् ।
सन् २०१८ मा भारतको इण्डियन प्रिमियर लिग (आईपीएल) खेल्दै सन्दीपले फ्रेन्चाइज क्रिकेटमा पाइला चालेका थिए ।
लगत्तै उनले वेष्ट इण्डिजको सीपीएल, बंगलादेशको बीपीएल, पाकिस्तानको पीएसएल, अष्ट्रेलियाको बीबीएल जस्ता ठुला लिग नियमित खेल्दै आएका छन् ।
अचम्मको कुरा केछ भने सन्दीपले टी-ट्वान्टी अन्तराष्ट्रिय क्रिकेटमा डेब्यु समेत नेपालबाट गरेनन् ।
नेपालबाट सन्दीपले टी ट्वान्टी अन्तराष्ट्रिय क्रिकेट खेल्नु अघि उनले विश्व-११ बाट वेष्ट इण्डिजविरुद्ध टी-ट्वान्टी अन्तराष्ट्रिय क्रिकेटमा डेब्यु गरेका थिए ।
सन्दीप बुधबार मात्र आईपीएलमा सहभागिता जनाएर नेपाल फर्किएका छन् । युएईमा भएको १३ औं संस्करणको आईपीएलमा उनको टिम दिल्ली क्यापिटल्स फाइनल पुगेपनि सन्दीपले मैदान उत्रने मौका पाएनन् ।
सन्दीपले कुनै पनि विदेशी फ्रेन्चाइजमा एक खेल नखेली फर्किनु परेको यो पहिलो पटक हो । केही साताको बसाइपछि सन्दीप बिग बास लिगको लागि अष्ट्रेलिया प्रस्थान गर्ने छन् । यद्दपी सन्दीपले खेल्ने बिग बास टिम सार्वजनिक भएको छैन ।
क्रिकेटर बनेर विश्वमा चर्चा कमाईरहेका सन्दीपलाई उनका बुबा भने इन्जिनियर बनाउन चाहन्थे ।
नेपाल फर्किएका सन्दीपले भारतीय कमेन्टेटर आकाश चोपडासँगको एक टल्क शोमा यस्तो खुलासा गरेका हुन् ।
'म पढाइमा निकै राम्रो विद्यार्थी थिए । मेरो बुबाले मलाई इन्जिनियर बनाउन चाहनु हुन्थ्यो,' सन्दीपले वैठ और बोल नामक शोमा भने, 'सबैका बुबाको लक्ष्य आफ्नो छोरालाई डाक्टर वा इन्जिनियर बनाउने हुन्छ ।'
यस्तै सन्दीपले त्यस्तो अवस्थामा आफुले परिवारलाई क्रिकेटर बन्छु भन्नु निकै कठिन भएको बताए ।
'यस्तो अवस्थामा मैले पढाइलाई निरन्तर दिनु वा क्रिकेटमा भविष्य खोज्नु, त्यो समय मेरो लागि निकै कठिन थियो,' सन्दीपले थपे , 'नेपाल क्रिकेटको भविष्य थिएन, तर मेरो सोच जसरी हुन्छ क्रिकेटर बन्नु थियो ।'
सन्दीपले त्यस समय आफ्नो सपना भने राष्ट्रको लागि क्रिकेट खेल्नु मात्र रहेको समेत बताए ।
'मलाई मेरो राष्ट्रको लागि क्रिकेट खेल्नु थियो। हरेक समय त्यही कुरा दिमागमा हुन्थ्यो । हरेक दिन त्यही सोच्थे,' सन्दीप भनेका छन्, 'मलाइ थाहा थिएन नेपालमा क्रिकेट खेलेर कति कमाउन सक्छु । मेरो भविष्य के हुन्थ्यो केही थाहा थिएन तर मलाई नेपालको लागि लामो समय क्रिकेट खेल्नु थियो ।'
तर, नेपाल क्रिकेट संघ क्यानलाई आईसीसीले निलम्बन गरेपछि भने क्रिकेट खेलाडीको भविष्यमाथि सबैले सोच्न बाध्य बनेको समेत सन्दीपले बताए ।
'सन् २०१६ मा मेरो नेपालको लागि घरेलु मैदानमा नामिबियाविरुद्ध डेब्यु खेल थियो । उक्त टुरबाट नेपाल क्रिकेट संघ (क्यान) निलम्बनमा पर्यो । त्यसपछी खेलाडी र नेपाल क्रिकेटको भविष्यमा अन्योलता छायो । के गर्ने के नगर्ने भयौं,' सन्दीपले थपे, 'केही थिएन, मात्र खेलको भत्तामा सिमित थियौं जुन ५० डलर थियो । त्यो समयमा समर्थकको विश्वास नै सबै भन्दा ठुलो थियो । नेपालका क्रिकेट समर्थक निकै सकारात्मक र पागल छन् । यस बीचमा हामीले धेरै उतारचढाव भोग्नु पर्यो चाहे त्यो पैसामा होस् या सिस्टममा । तर, खेलाडीमा विश्वास र एक अर्कामाथिको भरोसा कायम थियो जसको कारण नेपाल क्रिकेट अहिले यहाँ छ ।'
नेपालले सन् २०१८ मा पहिलो पटक एकदिवसीय अन्तराष्ट्रिय क्रिकेटको मान्यता पाएको थियो । जिम्बाबेमा भएको आईसीसी विश्वकप छनोटमा शीर्ष ४ मा रहेर नेपालले ऐतिहासिक एकदिवसीय मान्यता पाएको थियो ।
यस्तै आईसीसीले समेत क्यानको निलम्बन फुकुवा गरिसकेको छ ।
-1736646447.jpg)
-1736609631.jpeg)
