काठमाडाै । राष्ट्रिय खेलकुद परिषदका सदस्य सचिव केशवकुमार विष्टले एशियाडमा भएको खराब प्रर्दशनको जिम्मेवारी आफुले लिने बताएका छन् ।
पदकको आश गरिएको मार्सल आर्ट लगायतका खेलमा आएको खराब नतिजामा आफुबाट कमजोरी रहेको स्विकार गर्दै उनले पराजयको सम्पुर्ण जिम्मेवारी लिने बताएका हुन् ।
‘मार्सलआर्ट, तेक्वान्दो लगायत आश गरिएको खेलमा पदक आउन सकेन ।’ उनले भने, ‘हामीबाट कमीकमजोरी भएको छ । हारको सम्पुर्ण जिम्मेवारी मै लिन्छु ।’
एशियाडमा रजत पदक विजेता टोलीको सम्मान सोमबार काठमाडौंमा आयोजित कार्यक्रममा सदस्य सचिव विष्टले एशियाडमा भएको कमीकमजोर सच्चाएर अघि बढ्ने बताए । ‘गल्तीलाई सोचेर अघि बढ्छौ ।’ विष्टले भने ।
उनले आसन्न सागमा उत्कृष्ट प्रर्दशन गर्ने खेलाडीलाई बैदेशिक प्रशिक्षण लगायतको व्यवस्था गर्ने प्रतिबद्धता समेत जनाएका छन् ।
नेपालले इन्डोनेशियामा सम्पन्न एशियाडमा तेक्वान्दो, कराँते र उसु लगायतका खेलबाट पदकको आश गरेको थियो । तर सबै खेल पदक विहिन भएपछि नेपाल शुन्य हात फर्कने सम्भावना बढेको थियो । अन्तिममा आएर प्याराग्लाईडिङले रजत पदक जितेपछि नेपाल पदक विहिनबाट जोगिएको हो ।
सोही पदक विजेता टोलीलाई राखेपले सोमबार नगरपरिक्रमा सहित सम्मान गरेको छ ।
