विश्वकप छनाेटमा ब्राजिलको शानदार सुरुवात

एजेन्सी । विश्वकप छनोटमा ब्राजिलमा शानदार सुरुवात गरेको छ ।

शनिबार बिहान भएको दक्षिण अमेरिकी छनोटमा ब्राजिलले बोलिभियालाई ५–० गोल अन्तरले हराएको हो ।

ब्राजिलको जितमा दुई गोल रोबर्टो फिर्मिन्होले गरे । मार्कुन्होस र फिलिप कौटिन्होले एक एक गोल गरे । ब्राजिलले एक आत्मघाति गोल उपहार पाएको हो ।

घरेलु टोली ब्राजिलले खेलको १६ औं मिनेटमा मार्कुन्होसको गोलमा अग्रता बनाएको थियो । ड्यानिलोले उपलब्ध गराएको बलमा मार्कुन्होसले गोल गर्दै घरेलु टोलीलाई अग्रता दिलाएका थिए ।

रोबर्टो फिर्मिन्होले ब्राजिलको अग्रता दोब्बर बनाए । रिनान लोडीको पासमा लिभरपुल स्टार फिर्मिन्होले ३० औं मिनेटमा ब्राजिलको अग्रता दोब्बर बनाएका थिए ।

५४ औं मिनेटमा फिर्मिन्होले व्यक्तिगत दोस्रो गोल गर्दै ब्राजिललाई ३–० को अग्रता दिलाएका थिए । नेयमारले डिबक्सभित्र उपलब्ध गराएको पासमा फिर्मिन्होले पोस्टको दिशा दिएका थिए ।

ब्राजिलले ६६ औं मिनेटमा आत्मघाति गोल उपहार पायो । कौटिन्होको डिबक्सभित्र निकालेको क्रसलाई कोलम्बियन डिफेन्डरले रोक्न खोज्दा आत्मघाति गोल हुन पुग्यो ।

७३ औं मिनेटमा कौटिन्होले हेडमार्फत गोल गर्दै ब्राजिललाई ५–० को जित दिलाए । नेयमारले निकालेको क्रसममा कौटिन्होले हेडमार्फत गोल गरेका थिए ।

जितसंगै ब्राजिलले छनोट प्रतियोगितामा शानदार सुरुवात गरेको छ । ब्राजिलले तालिकामा ३ अंक जोडेको छ ।

शनिबार बिहानै भएको अर्को खेलमा कोलम्बियाले भेनेजुयलालाई ३–० गोल अन्तरले हरायो ।

कोलम्बियाको जितमा लुइस मुरीलले दुई तथा डुभान जपताले एक गोल गरे ।

डुभान जपताले १६ औं मिनेटमा कोलम्बियालाई अ्रता दिलाएका थिए । लुइस मुरीलले २६ औं मिनेटमा कोलम्बियाको अग्रता दोब्बर बनाए । पहिलो हाफको इन्जुरी समयमा मुरीलले व्यक्तिगत दोस्रो गोल गर्दै कोलम्बियालाई सहज अवस्थामा पुर्याएका थिए ।

विश्वकप छनोटको पहिलो खेलमा जित निकाल्दै कोलम्बियाले ३ अंक जोडेको छ । भेनेजुयलाले पहिलो खेलमै हार ब्यहोरेको छ ।