कालिनकाे सम्झौता थप्ने एन्फाकाे तयारी

काठमाडौं । अखिल नेपाल फुटबल संघ (एन्फा)ले राष्ट्रिय पुरुष फुटबल टिमका विदेशी प्रशिक्षक योहान कालिनसंग सम्झौता नविकरणको तयारी गरेको छ ।

राष्ट्रिय टिमका स्विडिस प्रशिक्षक कालिनको सम्झौता फिफा विश्वकप छनोटका बाँकी खेलसम्मका लागि थप्ने तयारी गरिएको एन्फाले जनाएको छ ।

फिफा विश्वकप २०२२ छनोट दोस्रो चरण खेलिरहेको नेपालले घरेलु मैदानमा बाँकी तीन खेल खेल्न बाँकी छ ।

कालिनको सम्झौता सकिने अवस्थामा पुग्नु र कोरोनाको महामारीले खेलेको टुंगो नलाग्दा एन्फा मुख्य प्रशिक्षकको सम्झौता नविकरण गर्ने तयारीमा जुटेको हो ।

एन्फाका महासचिव इन्द्रमान तुलाधरले खेलपाटीसँग बोल्दै कालिनको सम्झौता नविकरण गर्ने तयारी भएको र लगभग टुंगोमा पुगिसकेको बताए ।

‘बाँकी खेल रहेको कारण उनको सम्झौता थप्ने तयारी गरेको छौं । बाँकी तीन खेलका लागि उनी नेपाली टिमसँग रहन्छन् ।’ उनले भने ।

चैत्र ११ गते सरकारले देशभर पूर्ण रुपमा लकडाउन लागू गरेसँगै कालिन स्वदेश फर्किएका थिए ।

सरकारले लकडाउन गर्नु एक साता अघिनै एन्फाले राष्ट्रिय टिमको प्रशिक्षण स्थगित गरेको थियो । त्यसयता उनी स्विडेनमा रहेका छन् ।

एन्फाले फिफा विश्वकप छनोट र साफ फुटबललाई लक्षित गर्दै विदेशी प्रशिक्षक कालिनसंग सम्झौता गरेको हो । एन्फाले कालिनसँग सुरुवातमा दुई बर्षको लागि सम्झौता गरेको थियो । सुरुवातमा गरिएको सम्झौता आगामी जनवरीमा २८ मा सकिदैछ ।

जनवरीमा एन्फासंग सम्झौता गरेका कालिन मार्चमा मात्र नेपाल आईपुगेका थिए ।

एन्फाले बाँकी खेलका लागि खेलाडी छनोट गरेर प्रशिक्षण समेत सुरु भएको अवस्थामा कालिनलाईनै टिम हेर्ने जिम्मेवारी दिन लागेको हो ।

‘उनले (कालिन)सबै खेल हेर्ने कुरा भएको थियो । प्रशिक्षण पनि सुुुरु भैसकेको अवस्था छ । विश्वकप छनोटको बाँकी खेलका लागि उनलाईनै राख्ने तयारी गरेको छौं ।’ महासचिव तुलाधरले भने ।

यसअघि राष्ट्रिय टिमको बाँकी तीन खेल चैत र बैशाखमा भएपनि कोरोना महामारीका कारण कार्तिक र असोजमा सारिएको थियो ।

विश्वभर अन्तराष्ट्रिय उडान रद्ध भएको र कोरोना संक्रमण बढ्दै गएको भन्दै फिफा र एएफसीले तेस्रो पटकको लागि छनोट प्रतियोगिता स्थगित गरेका छन् । फिफाले सन् २०२१ सम्मका लागि प्रतियोगिता स्थगित गरेको छ ।

नेपालले कालिनको नेतृृत्वमा पहिलो पटक सन् २०१९ मार्च २१ मा कुवेतविरुद्ध खेलेको थियो । उनको नेतृत्वमा नेपालले ११ अन्तराष्ट्रिय खेल खेलेको छ । जसमा एक मात्रै जित चाईनिज ताईपेविरुद्ध निकालेको छ । यस्तै, कुवेत र चाईनिज ताईपेविरुद्धको दुई मैत्रीपूर्ण खेल बराबरीमा सकिएको थियो ।

फिफा विश्वकप छनोट र सन् २०२३ एसिया कप छनोट खेलिरहेका नेपालले ५ खेलबाट ३ अंक जोडेको छ । अष्टे«लिया शीर्ष स्थानमा रहेको समूहमा नेपाल पाचौं स्थानमा रहेको छ ।

यसअघि उनी सन् २०१३–१४ को शहिद स्मारक ए डिभिजन लिगमा मछिन्द्र क्लब हेर्न नेपाल आएका थिए ।