तेस्रो जितसहित बाँसबारी शीर्ष स्थानमा

काठमाडौं । बाँसबारी फुटबल क्लबले सहिद स्मारक 'बी' डिभिजन लिग फुटबलमा लगातार तेस्रो जित निकालेको छ ।

एन्फा कम्प्लेक्स सातदोबाटोमा आइतबार भएको खेलमा मध्यपुर युथ एसोसियसनलाई ५-२ गोल अन्तरले पराजित गर्दै बाँसबारीले लगातार दोस्रो जित निकालेको हो ।

बाँसबारीको जितमा सुलेमान थापा मगर र सजिन थापा मगरले दुई दुई गोल गरे । सुरेश कुमालले थप एक गोल गरे ।

मध्यपुरका धिरज श्रेष्ठ र सन्नी लामाले एक एक गोल फर्काए ।

जितसँगै बाँसबारीले ३ खेलमा ९ अंक जोडको छ । र, बाँसबारी शीर्ष स्थानमा उक्लिएको छ ।

यस अघि बाँसबारीले पहिलो खेलमा श्री भगवती क्लब र दोस्रो खेलमा ब्वाईज युनियन क्लबलाई हराएको थियो ।

मध्यपुरको यो लगातार तेस्रो हार हो । पहिलो खेलमा मध्यपुर खुमलटार युथ क्लब र दोस्रो खेलमा श्री भगवती क्लबसँग पराजित भएको थियो ।

आगामी चैत २३ गतेसम्म चल्ने लिगमा लिगमा १२ क्लबले प्रतिस्पर्धा गरिरहेका छन् ।

एक टिम 'ए' डिभिजन लिगमा बढुवा हुनेछ भने एक टिम 'सी' डिभिजनमा घटुवा हुनेछ ।