मनाङ बूढासुब्बा गोल्डकपको फाइनलमा

धरान । मनाङ मर्स्याङ्दी क्लब धरानमा जारी २२ औं बूढासुब्बा गोल्डकप फुटबलको फाइनलमा प्रवेश गरेको छ ।

धरान रंगशालामा बुधबार भएको पहिलो सेमिफाइनलमा भारतको युके एफसीलाई २-० ले हराउँदै मनाङ उपाधि नजिक पुगेको हो ।

मनाङको जितमा विमल राना र दयानन्द सिंहले एक एक गोल गरे ।

खेलको २० औं मिनेटमा विमलले गोल गर्दै मनाङलाई सुरुवाती अग्रता दिलाएका थिए । त्यसपछि खेलको इन्जुरी समयमा दयानन्दले गोल गर्दै मनाङलाई २-० को जित दिलाए ।

अब मनाङले फाइनलमा मछिन्द्र फुटबल क्लब र नेपाल पुलिस क्लबबीचको विजेतासँग खेल्नेछ ।

यस अघि उपाधि दाबेदार मनाङले क्वाटरफाइनलमा मोरङको बेलबारी फुटबल क्लबलाई ४-० गोल अन्तरले पराजित गरेको थियो ।

भारतीय टोलीले भने आयोजक धरान फुटबल क्लबलाई हराएको थियो ।

प्रतियोगिताको विजेताले १० लाख र उपविजेताले नगद ५ लाख रुपैयाँ प्राप्त गर्ने छन् । सर्वोकृष्ट खेलाडीले होण्डा कम्पनीको डियो स्कुटर पाउनेछन् ।

यस्तै सर्वाधिक गोलकर्ताले ३५ हजार र व्यक्तिगत विधातर्फ उत्कृष्ट हुनेले जनही २५ हजार पाउने छन् ।