थ्री स्टार खप्तड गोल्डकपको सेमिफाइनलमा

धनगढी । ललितपुरे क्लब थ्री स्टार सर्वाधिक धनराशिको चौंथो खप्तड गोल्डकप फुटबलको सेमिफाइनलमा प्रवेश गरेको छ ।

कैलाली हसनपुरस्थित धनगढी रंगशालामा बुधबार सिमराको नव जनजागृति क्लबलाई २-० गोल अन्तरले पराजित गर्दै थ्री स्टार अन्तिम चारमा पुगेको हो ।

थ्री स्टारको जितमा संजोग राई र आशिष राईले एक एक गोल गरे ।

पहिलो हाफ गोलरहित बराबरीमा सकिएको खेलको दोस्रो हाफमा थ्री स्टारले दुई गोल गरेको थियो । खेलको ८१ औं मिनेटमा निशान खड्काको पासमा संजोगले हेड गोल गर्दै थ्री स्टारलाई अग्रता दिलाए ।

त्यसपछि खेलको ८३ औं मिनेटमा आशिषले गोल गर्दै थ्री स्टारको जित सुनिश्चित गरे । आशिषले पनि निशान खड्काकै पासलाई सदुपयोग गरे ।

खेलको म्यान अफ दि म्याच थ्री स्टारका कप्तान विक्रम लामा चुनिए ।

अब थ्री स्टारले फाइनल प्रवेशको लागि हिमालयन शेर्पा क्लब र गोर्खा ब्वाइज क्लब रुपन्देहीबीचको विजेतासँग खेल्नेछ ।

प्रतियोगिताको तेस्रो क्वाटरफाइनलमा बिहिबार नेपाल पुलिस क्लब र एपीएफ क्लब भिड्ने छन् ।

खेलपछि थ्री स्टारका प्रशिक्षक मेघराज केसीले सिमराले सोचेको भन्दा उत्कृष्ट प्रदर्शन गरेको बताए । उनले लामो यात्राको कारण समेत टिमले सोचेको जस्तो नतिजा निकाल्न नसकेको बताए ।

'सिमराले सोचेको भन्दा राम्रो खेल्यो । त्यसैले गोल निकाल्न गार्हो भयो,' उनले भने, '२७-२८ घण्टाको यात्राले पनि गार्हो भयो । तर, प्रदर्शनबाट खुसी छु ।' 

सिमराका प्रशिक्षक सोनु क्षेत्रीले दोस्रो हाफमा तालमेल नमिल्दा गोल खानु परेको बताए ।

'पहिलो हाफमा रोक्न सक्युन दोस्रो हाफमा तालमेल नमिल्दा गोल खायौं । 'ए' डिभिजनको टिमसँग यत्तिको खेल्नु राम्रो हो', उनले भने।