मछिन्द्र सताक्षी गोल्डकपको सेमिफाइनलमा

काठमाडौं । 'ए' डिभिजन लिग च्याम्पियन मछिन्द्र फुटबल क्लब तेस्रो संस्करणको सताक्षी गोल्डकप फुटबलको सेमिफाइनलमा प्रवेश गरेको छ ।

झापाको झिलझिलेस्थित गणेशमानसिंह अध्ययन प्रतिष्ठान रंगशालामा बुधबार गोर्खा ब्वाईज रुपन्देहीलाई २-१ गोल अन्तरले पराजित गर्दै मछिन्द्र अन्तिम चारमा पुगेको हो ।

मछिन्द्रले १ गोलले पछि परेको स्थिति उल्टाएर गोर्खालाई हराएको हो । मछिन्द्रको जितमा आन्द्रेस निया र विमल घर्ति मगरले एक एक गोल गरे । गोर्खाका काजिमले एक गोल फर्काए ।

अब मछिन्द्रले सेमिफाइनलमा विभागीय टिम त्रिभुवन आर्मी क्लबसँग खेल्नेछ ।

लिगको उपविजेता आर्मी दार्जीलिङको एमएफसीलाई २-१ गोल अन्तरले पराजित गर्दै सेमिफाइनलमा पुगिसकेको छ ।

सतासीधाम स्पोर्टिङ क्लबको आयोजनामा जारी प्रतियोगिताको विजेताले ६ लाख नगद पाउने छ। उपविजेताले ३ लाख पाउने छ । यस्तै प्रतियोगिताका म्यान अफ दि टुर्नामेन्टले ५० हजार र हाइ स्कोररलाई २५ हजार पाउने छन् ।

त्यस्तै, उत्कृष्ट मिडफिल्डर, फरवार्ड, डिफेन्डर, गोलकिपर र उत्कृष्ट प्रशिक्षकले जनही २०/२० हजार पाउने छन् ।