सरस्वती 'बी' डिभिजनमा घटुवा

काठमाडौं । सरस्वती युथ क्लब सहिद स्मारक 'ए' डिभिजन लिग फुटबलबाट 'बी' डिभिजनमा घटुवा भएको छ ।

सहिद स्मारक 'ए' डिभिजन लिग अन्तर्गत सोमबार १२ औं चरणको खेलमा च्यासल युथ क्लबसँग २-१ गोल अन्तरले पराजित हुँदै सरस्वती 'बी' डिभिजन लिगमा घटुवा भएको हो ।

नेपाली फुटबलको शीर्ष डिभिजनमा रहिरहन जित्नै पर्ने खेलमा पराजित भएपछि सरस्वती लिगको एक खेल बाँकी रहदै घटुवा भएको हो । 

सरस्वतीबाहेक अन्य टोली अब घटुवा हुने छैनन् । अखिल नेपाल फुटबल संघ एन्फाले यस पटक १४ टोलीमा एक टोली मात्र घटुवा हुने प्रावधान बनाएको थियो ।

क्लबको इतिहासमा सरस्वती दोस्रो पटक घटुवा भएको हो । बिस २०६३ सालमा पहिलो पटक 'ए' डिभिजन लिग खेलेको सरस्वती त्यहिँ वर्ष 'बी' डिभिजनमा घटुवा भएको थियो । सरस्वती बिस २०६८ यता भने लगातार शीर्ष लिग खेलिरहेको छ ।

एन्फा कम्प्लेक्स सातदोबाटोमा च्यासललाई जित दिलाउन जापानी खेलाडीद्वय ताइगा नाकामुरा र हायातो वाकिनोले एक एक गोल गरे । सरस्वतीका काजिम बुसारीले एक गोल फर्काए  ।

खेलको १८ औं मिनेटमा नाकामुराले गोल गर्दै च्यासललाई अग्रता दिलाएका थिए । खेलको ६६ औं मिनेटमा वाकिनोले गोल गर्दै च्यासललाई २-० को अग्रता दिलाए । त्यसपछि खेलको इन्जुरी समयको अन्तिम मिनेटमा सरस्वतीका बुसारीले एक गोल फर्काएपनि टोलीको हार टार्न सकेनन् ।

खेलको म्यान अफ दि म्याच च्यासलका नाकामुरा चुनिए ।

च्यासलसँगको हारसँगै सरस्वतीले १२ खेलमा ४ अंक जोड्यो । लिगको अन्तिम खेल जितेपनि सरस्वतीले पुछारबाट दोस्रो स्थानमा रहेको एपीएफलाई पछि बनाउन सक्ने छैनन् ।

एपीएफको ८ अंक रहेको छ । एपीएफले सोमबार नै फ्रेन्ड्सलाई ५-२ गोल अन्तरले पराजित गरेको थियो ।

अब सरस्वतीले लिगको अन्तिम खेलमा संकटा क्लबसँग खेल्नेछ ।  

सरस्वतीलाई पराजित गरेसँगै च्यासल भने १५ अंक जोडेर नवौं स्थानमा उक्लिएको छ ।

के भन्छन् प्रशिक्षक ?

घटुवा भएपछि सरस्वतीका सरस्वतीका प्रशिक्षक प्रदिप नेपालले टिमको स्ट्राइकर राम्रो नहुँदा घटुवा हुनु परेको बताए ।

'मैले बारम्बार भन्दै आएको छु टिमको स्ट्राइकर कमजोर छ । हाम्रो टिमको स्ट्राइकर कमजोर हुँदा नै घटुवा भएका छौँ । जसको कारण खेल बिग्रियो । हाम्रो सबै पक्ष राम्रो छ तर फरवार्डमा समस्या रह्यो,' उनले भने ।

यस्तै प्रशिक्षक नेपालले टिमलाई जिताउन आफुले सक्दो प्रयास गरेको बताए ।

च्यासलका प्रशिक्षक बाल गोपाल साहुखलले रेफ्रीको भूमिकामा प्रश्न उठाए ।

'खेल राम्रो भयो, समग्रमा राम्रो खेल्यो केटाहरुले। तर, खेल रेफ्रीको कारण धेरै डिस्टर्ब बन्यो,' उनले भने, 'सिजनको सुरुवातबाटै रेफ्रीको स्तर कम स्तरको थियो ।'

यस्तै उनले टिमको शीर्ष ६ निकै कठिन रहेको समेत बताए ।