पोखरा । पोखरामा पहिलो संस्करणको खुल्ला पुरुष बिच भलिबल प्रतियोगिता हुने भएको छ । कास्की जिल्ला भलिबल संघको आयोजनामा हुने बिच भलिबल भदौ पहिलो साता आयोजना हुने छ ।
पोखरा फेवातालको किनार बाराही घाटमा हुने प्रतियोगिता भदौ १ देखि ३ गते सम्म आयोजना हुने संघले जनाएको छ । संघका अध्यक्ष भिम पराजुलीका अनुसार प्रतियोगितामा २५ भन्दा बढीको टिमको सहभागिता रहने छ ।
प्रतियोगिताको विजेताले ३० हजार पुरस्कार प्राप्त गर्दा उपविजेताले २० हजार पाउने छन् । प्रतियोगितामा टिम दर्ताका लागि साउन ३० गते सम्म समय तोकिएको छ ।
पोखरालाई खेलकुद मार्फत पर्यटन प्रवद्र्धन गर्न तथा बिच भलिबलका खेलाडी उत्पादनलाई समेत मध्येनजर गर्दै प्रतियोगिता आयोजना गर्न लागिएको अध्यक्ष पराजुलीले बताए ।
यस्तै संघका वरिष्ठ उपाध्यक्ष एवम कास्की जिल्ला खेलकुद बिकास समितीका अध्यक्ष याम गुरुङले १३ औं दक्षिण एशियाली खेलकुद (साग) मा समेत पोखरामा बिच भलिबलका तयारी भइरहेको बताए ।
