भारतसँग पराजित हुँदै नेपाल बाहिरियो

काठमाडौं । घरेलु भूमिमा जारी १३ औं दक्षिण एसियाली खेलकुद प्रतियोगिता (साग) अन्तर्गत पुरुष भलिबलमा नेपाल समूह चरणबाटै बाहिरिएको छ ।

शुक्रबार भएको समूह चरणको अन्तिम खेलमा भारतसँग ३-० को सोझो सेटमा पराजित हुँदै नेपाल समूह चरणबाट बाहिरिएको हो ।

त्रिपुरेश्वरस्थित कभर्डहलमा सेमिफाइनलमा पुग्न जित्नै पर्ने खेलमा नेपाल भारतसँग २५-१५, २५-१३ र २५-१६ ले पराजित भयो ।

नेपालले बलियो भारतविरुद्ध कुनै पनि सेटमा चुनौती दिन सकेन । नेपालका लागि धन बहादुर भट्टले सर्वाधिक ७ अंक जोड्दा राजेन्द्र बिष्टले ६ अंक जोडे ।

नेपाललाई हराएसँगै भारत समूह 'ए' को विजेता बन्दै सेमिफाइनलमा प्रवेश गरेको छ । भारतले २ खेलमा ४ अंक जोड्यो ।

यस समूहबाट बंगलादेश २ खेलमा २ अंक जोड्दै उपविजेता बन्दै सेमिफाइनलमा प्रवेश गरेको छ ।

नेपालले दुई खेलमा हार व्यहोर्दै अंक जोड्न सकेन् । पहिलो खेलमा नेपाल बंगलादेशसँग ३-२ को सेटमा पराजित भएको थियो । पहिलो सेट जितेपनि नेपालले बंगलादेशसँगको खेल गुमाएको थियो ।

महिलातर्फ भने नेपाल सेमिफाइनलमा प्रवेश गरेको छ ।