नेपालको सेमिफाइनल प्रतिद्वन्दी श्रीलंका

काठमाडौं । घरेलु भूमिमा जारी १३ औं दक्षिण एसियाली खेलकुद प्रतियोगिता (साग) अन्तर्गत महिला भलिबलको सेमिफाइनलमा नेपालले श्रीलंकाको सामना गर्ने भएको छ ।

शुक्रबार समूह चरण अन्तर्गत माल्दिभ्स र श्रीलंकाबीचको अन्तिम खेल सकिएसँगै नेपालले सेमिफाइनलमा श्रीलंकालाई प्रतिद्वन्दी पाएको हो ।

त्रिपुरेश्वरस्थित राखेप कभर्ड हलमा भएको अन्तिम खेलम श्रीलंकाले माल्दिभ्सलाई ३-० को सोझो सेटमा पराजित गर्यो । श्रीलंकाले माल्दिभ्समाथि २५-१५, २५-१८ र २५-१४ को जित निकाल्यो ।

माल्दिभ्सलाई हराएसँगै श्रीलंका समूह 'बी' को विजेता बन्दै सेमिफाइनलमा पुग्न सफल भयो । र, सेमिफाइनलमा श्रीलंकाले नेपालसँगको भेट पक्का गर्यो ।

नेपाल समूह 'ए' को उपविजेता बन्दै सेमिफाइनलमा पुगेको हो ।

अब नेपालले दोस्रो सेमिफाइनलमा शनिबार श्रीलंकाको सामना गर्नेछ ।

यस्तै समूह 'बी' को उपविजेता माल्दिभ्सले सेमिफाइनलमा भारतको सामना गर्नेछ । भारत समूह 'ए' को विजेता बन्दै सेमिफाइनलमा पुगिसकेको छ ।

भारत र माल्दिभ्सबीचको पहिलो सेमिफाइनल खेल शनिबार नै हुनेछ ।