बंगलादेशलाई हराउँदै भारत सेमिफाइनलमा

काठमाडौं । भारत १३ औं दक्षिण एसियाली खेलकुद प्रतियोगिता (साग) अन्तर्गत महिला भलिबलको सेमिफाइनलमा प्रवेश गरेको छ ।

त्रिपुरेश्वरस्थित राखेप कभर्ड हलमा शुक्रबार भएको समूह चरणको अन्तिम खेलमा बंगलादेशलाई ३-० को सोझो सेटमा पराजित गर्दै भारत सेमिफाइनलमा पुगेको हो ।

कमजोर प्रतिद्वन्दी बंगलादेशविरुद्ध भारतले २५-८, २५-११ र २५-९ को सेटमा जित निकाल्यो ।

जितसँगै समूह 'ए' को भारत समूह विजेता बनेको छ । भारतले दुई खेलमा ४ अंक जोड्यो ।

यो हारसँगै बंगलादेश समूह चरणबाट बाहिरिएको छ । दुई खेलमा बंगलादेशले अंक जोड्न सकेन ।

यस समूहमा एक खेल जितेको नेपाल २ अंक जोडेर समूह उपविजेता बन्दै सेमिफाइनलमा पुगेको छ ।