काठमाडौं । नेपाली राष्ट्रिय महिला भलिबल टिमका मुख्य प्रशिक्षक जगदीश भट्टले भारतलाई पराजित हराउँन सके १३ औं दक्षिण एसियाली खेलकुद (साग) मा नेपालले स्वर्ण जित्ने बताएका छन् ।
सागको महिला भलिबल अन्तर्गत बुधबार भएको उद्घाटन खेलमा बंगलादेशलाई ३-० को सोझो सेटमा पराजित गरेपछि बोल्दै प्रशिक्षक भट्टले भारतलाई हराउँन सके उपाधि जित्ने पक्का रहेको बताए ।
'भारत दक्षिण एसियाको पावर हाउस टिम हो । भारतसँग खेल्दा प्रेसर हुन्छ नै । तर, कोर्टमा हामी आत्मबलका साथ खेल्नेछौं,' प्रशिक्षक भट्टले भने, ' भारतलाई पराजित गर्नसके स्वर्ण नजिक हुनेछौं।'
समूह 'ए' मा रहेको नेपालले समूह चरणको अन्तिम खेलमा बिहिबार भारतसँग खेल्नेछ । नेपाल भारतलाई हराउँदै सेमिफाइनल पुग्न चाहन्छ ।
तर प्रशिक्षक भट्टले भारतलाई हराउँन टिमको प्रदर्शनमा अझै सुधार गर्नु पर्ने बताए ।
'हामीलाई जसरी हुन्छ उपाधि जित्नुछ । त्यसैको प्रेसर छ । त्यसैमा लागेका छौं । हाम्रो अहिलेको खेलमा ६० प्रतिशत राम्रो गर्याै भने उपाधि हात पर्नेछ,' भट्टले भने ।
यस्तै प्रशिक्षक भट्टले बंगलादेशको प्रदर्शन राम्रो नहुँदा नेपालको पहिलो खेल पनि बिग्रिएको बताए ।
'बंगलादेशको प्रदर्शन हामी भन्दा तल नै छ । हाम्रो राम्रो प्रदर्शन भएको छ तर विपक्षीले राम्रो नखेल्दा हाम्रो खेलपनि स्लो देखिन पुग्यो । यस्तै सर्विस लगायतमा राम्रो भएन्,' भट्टले थपे ।
प्रशिक्षक भट्टले टिम उत्कृष्ट बनाउन नेपालले चार महिनाबाट तयारी गरेको समेत बताए ।
यस्तै कप्तान अरुणा शाहीले भारतविरुद्धको खेलमा बंगलादेशसँग गरेको गल्तिहरु सुधार गर्ने बताए ।
'राम्रो खेलेको हो । आजको कमीकमजोरी अर्काे खेलमा सुधार गर्नेछौं । विपक्षी स्लो हुँदा हामीपनि स्लो हुन पुग्यौं,' कप्तान शाहीले भनिन् ।
