काठमाडौं । नेपाली राष्ट्रिय पुरुष भलिबल टिमको मुख्य प्रशिक्षकमा नेदरल्याण्डका लेस्ले डि जोङ नियुक्त भएका छन् ।
नेपाल भलिबल संघले नेपालमा आयोजना हुने १३ औं दक्षिण एसियाली खेलकुद (साग) को लागि डच प्रशिक्षक डि जोङलाई नियुक्त गरेको हो ।
डच प्रशिक्षक डि जोङलाई सागसम्मका लागि संघले बोलाएको पुरुष भलिबल टिम हेरिरहेका मुख्य प्रशिक्षक विरेन्द्र चौधरीले खेलपाटीलाई जानकारी गराए ।
प्रशिक्षक चौधरीका अनुसार डि जोङले नेपाली टिमलाई भारतमा भेट्ने छन् । नेपाली टिम विशेष प्रशिक्षणका लागि आगामी हप्ता भारत जाने छन् ।
भारतको भलिबल फेडेरेसनको निमन्त्रणा मैत्रीपूर्ण खेल र प्रशिक्षणका लागि नेपाली टिम अर्को बिहिबार भारत जाने छन् । मैत्रीपूर्ण खेल र प्रशिक्षणको तालिका भने भारत पुगेपछि तय हुने प्रशिक्षक चौधरीले बताए ।
डि जोङले यसअघि पनि नेपाली टिमलाई प्रशिक्षण दिएका थिए । उनले नेपाली टोलीलाई इन्डोनेसियामा गत वर्ष भएको एसियन गेम्सअघि प्रशिक्षण दिएका थिए । त्यसअघि सन् २०१८ मा पनि उनले नेपाली टिम हेरेका थिए ।
-1732413260.jpg)
