काठमाडौं । नेपाली राष्ट्रिय महिला भलिबल टिमले आगामी कात्तिक र मंसिरमा दुई ठुला प्रतियोगिता खेल्दै छन् ।
नेपालीले आगामी कात्तिकमा बंगलादेशमा हुने एसियन भलिबल कन्फेडेरेसन (एभिसी) सेन्ट्रल जोन सिनियर महिला भलिबल च्याम्पियनसिप खेल्नेछ ।
त्यस लगत्तै नेपाली टोलीले घरेलु मैदानमा आयोजना हुने १३ औं दक्षिण एसियाली खेलकुद (साग) मा प्रतिस्पर्धा गर्दैछ ।
नेपाली टोली यतिबेला १३ औं सागको बन्द प्रशिक्षणमा रहेका छन् । नेपाली टिम गत साउन १ गतेबाट प्रशिक्षणमा होमिएका थिए । तर, बन्द प्रशिक्षणमा रहेका राष्ट्रिय टिमका खेलाडीहरु भने मैत्रीपूर्ण खेलको अभाव महसुस गरिरहेका छन् ।
सागको बन्द प्रशिक्षणमा रहेका खेलाडीले आफुहरुको प्रर्दशनको परिक्षण गर्न समेत मैत्रीपूर्ण खेलको आवश्यकता रहेको बताएका छन् ।
राष्ट्रिय टिमकी महत्वपुर्ण सदस्य रेश्मा भण्डारीले प्रशिक्षणमा बसेको दुई महिना बितेको बताउँदै आफ्ना कमीकमजोरी सुधार गर्न अभ्यास खेलको आवश्यक रहेको बताईन् ।
‘बन्द प्रशिक्षणमा अभ्यास गरेको दुई महिना भैसक्यो । अभ्यासले खेलमा कति सुधार भयो भन्ने थाहा छैन । सोही कारण मैत्रीपूर्ण खेलको आवश्यकता छ,’ उनले भनिन् ।
‘खेलाडीबीच राम्रो सम्बन्ध भएपनि खेलमा तालमेल मिलाउने अनुभव लिन सकेको छैनौ । सोही कारण जति सक्दो धेरै खेल खेल्न आवश्यक छ ।’ रेश्मा थप्छिन् ।
उनले बंगलादेशमा कात्तिक २२ देखि २७ सम्म हुने एभिसी सेन्ट्रल जोन महिला भलिबल च्याम्पियनसिपले साग खेल्न धेरै सहयोग पुग्ने समेत बताईन् ।
‘सागमा केन्द्रित भईरहदाँ सेन्ट्रल जोनले सहयोग मिल्नेछ । विदेशीसँग खेल्न पाइन्छ र टिम अझै सेट हुन्छ । नयाँ अनुभव पनि हुन्छ ।’ उनले थपिन्, ‘नयाँ खेलाडीको खेल निखारिएको छ । सबैले राम्रो गरिरहेका छौ ।’
अर्की खेलाडी प्रतिभा मालीले भलिबल टिमको अभ्यास निकै राम्रो भएको बताईन् ।
‘पहिला भन्दा अभ्यास र तयारी धेरै राम्रो छ । लामो समय ट्रेनिङ भयो । पहिला एक, डेढ महिना अभ्यास हुन्थ्यो,' प्रतिभाले भनिन्, 'तर, अहिले चार महिना जति अभ्यास भईरहेको छ । पहिला ‘पावर’ अभ्यास भएको थिएन । अहिले हप्ताको दुई दिन गरिरहेका छौ ।’
उनले सेन्ट्रल जोन महिला भलिबललाई लिएर खेलाडी निकै उत्साहीत रहेको प्रतिक्रिया दिईन् ।
‘पहिलो पटक हुन लागेको छ, धेरै खुशी छौ । नयाँ अनुभव हो र हामीलाई अनुभवको खाँचो छ । अन्तराष्ट्रिय प्रतियोगिता खेल्न पाउदा भाग्यमानी महशुश गरिरहेको छु,’ उनी भन्छिन् ।
प्रतिभाले एभिसी सेन्ट्रल जोन खेल्ने टिमको बिषयमा टुङ्गो नभएपनि सागमा स्वर्ण जित्ने लक्ष्य राखेको खुलाईन् ।
‘सबै खेलाडीको पहिलो लक्ष्य स्वर्ण नै हो,' प्रतिभाले भनिन्,'हामी सबैको लक्ष्य स्वर्ण हो ।’
उनले बन्द प्रशिक्षणमा रहँदा प्रर्दशन सुधारिएको बताईन् । ‘सुरुमा घरबाट आउने जाने हुदाँ गाह्रो भैरहेको थियो । बन्द प्रशिक्षण हुँदा आराम गर्ने अनि खेल्ने हुन्छ । सबै ध्यान खेलमा मात्र भईरहन्छ । खेल पनि राम्रो भईरहेको छ,’ प्रतिभाले थपिन् ।
-1732413260.jpg)
