काठमाडौं । विभागीय टिम नेपाल पुलिस क्लब पहिलो संस्करणको 'प्रकाश दाहाल स्मृति प्रगतिशिल युवा नेपाल कप' राष्ट्रिय खुल्ला पुरुष भलिबल प्रतियोगिताको फाइनलमा प्रवेश गरेको छ ।
नयाँ बसपार्कस्थित ढोरपाटन क्लबको खेल मैदानमा आइतबार भएको दोस्रो सेमिफाइनलमा एपीएफ क्लबलाई ३-२ को सेटमा पराजित गर्दै पुलिस उपाधि नजिक पुगेको हो ।
निकै रोमान्चक बनेको खेलमा पुलिसले सुरुवाती दुई सेट २५-२१ र २५-२० ले जितेको थियो । तर, तेस्रो र चौंथो सेट एपीएफले २५-२० र २५-२१ ले जित्दै खेल रोमान्चक मोडमा ल्याएको थियो । तर, अन्तिम सेटमा एपीएफमाथि १६-१४ को सेटमा जित निकाल्दै पुलिस उपाधि नजिक पुग्न सफल भयो ।
अब पुलिसले उपाधिका लागि त्रिभुवन आर्मी क्लबसँग खेल्नेछ । आर्मी गण्डकीलाई ३-१ को सेटमा हराएर यसअघि नै फाइनल पुगिसकेको छ । फाइनल खेल सोमबार हुनेछ ।
प्रगतिशील यूवा नेपालको योजनामा जारी प्रतियोगिताको विजेताले ५ लाख रुपैया हात पार्नेछ । यस्तै दोस्रोले ३ लाख, तेस्रोले १ लाख र चौथोले ५० हजार रुपैया पाउने छन् ।
यस्तै प्रतियोगिताको सर्वाेत्कृष्ट खेलाडीले मोटरसाइकल पाउने आयोजकले जनाएको छ । त्यसबाहेक स्पाइकर, ब्लकर, डिफेन्डर, सर्भर र प्रशिक्षकलाई पनि पुरस्कृत गरिने छ ।
-1732413260.jpg)
