फर्किने भए एबिङ

काठमाडौं । नेपाल भलिबल संघले नेपाली राष्ट्रिय पुरुष भलिबल टिमको मुख्य प्रशिक्षक हान एबिङलाई विदाई गरेको छ । 

संघले बुधबार एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगिताका लागि नेपाल आएका डच प्रशिक्षक एबिङको विदाई गरेको हो । एबिङ बिहिबार नेदरल्याण्ड फर्कने छन् ।

नेपाल भलिबल संघका अध्यक्ष मनोरन्जन रमण शर्मा, संघका उपाध्यक्ष निरोज मास्के लगायतले एबिङलाई विदाई गरेका थिए ।

नेपालमा आयोजना भएको एभिसी सेन्ट्रल जोनका लागि एबिङ असार ४ गते नेपाल आईपुगेका थिए ।

प्रतियोगितामा नेपाल पाँचौ भएको थियो । पाँचौं स्थानको लागि भएको खेलमा नेपालले अफगानिस्तानलाई हराएको थियो । 

प्रतियोगिताको उपाधि भने किर्गीस्तानले जितेको थियो । 

नेपाल भलिबल संघको आग्रहमा अन्तराष्ट्रिय भलिबल महासंघ (एफआईभीभी) ले प्रशिक्षक एबिङलाई नेपाल पठाएको थियो ।