पोखरा । पोखराको लामाचौरमा तीज महोत्सव राष्ट्रिय महिला भलिबल प्रतियोगिता जारी छ । र, पोखरेली भलिबल स्टार सिपोरा गुरुङले यसै प्रतियोगिताबाट भलिबलमा पुनरागमन गरेकी छिन् ।
चोट र पढाईको कारण कोर्ट बाहिर रहदै आएकी सिपोरा नेपाली महिला भलिबलकै चर्चित क्लब होङ्गवान्जी न्यू डायमण्ड एकेडेमीबाट खेल्दै भलिबलमा फर्किएकी हुन् ।
राष्ट्रिय टिममा फर्कने योजनासहित भलिबलमा पुनरागमन गरेकी सिपोराको टिम न्यू डायमण्ड फाइनल समेत पुगिसकेको छ । न्यू डायमण्डले सोमबार हुने फाइनलमा नेपाल पुलिस क्लबसँग खेल्नेछ ।
न्यू डायमण्डबाट पहिलो पटक खेलेकी सिपोराले सेमिफाइनलमा भने घरेलु टिम गण्डकी प्रदेशविरुद्ध खेलेकी थिइन् । जुन खेलमा न्यू डायमण्डले गण्डकीलाई ३-० को सोझो सेटमा हराएको थियो ।
घरेलु कोर्ट र घरेलु टिम गण्डकीविरुद्ध सिपोराले उत्कृष्ट प्रदर्शन गरेकी थिइन् । तर, सिपोराले सेमिफाइनलमा गण्डकीविरुद्ध आफुले शतप्रतिशत खेल्न नसकेको बताएकी छिन् ।
'कोर्टमा उत्रिएपछि विपक्षी भनेको विपक्षी नै हो तर, अलि खुलेर खेल्न चै सकिन । आफै होम कोर्टमा आफ्नै बहिनीहरुविरुद्ध खेल्न अलि असहज लाग्यो,' गण्डकीसँगको खेलपछि सिपोराले भनिन्, 'समग्रमा मैले जति दिनु पर्ने दिन सकिन जस्तो लागेको छ । अलि अफ्ठ्यारो लागेर होला ।'
घरेलु टिमविरुद्ध खेल्दा आफुलाई केहि असहज महसुस भएको सिपोराको भनाई छ । सिपोराले गत वर्षको यस प्रतियोगिता गण्डकीबाट खेलेकी थिइन् । त्यसपछि सिपोरा अध्ययनको लागि अमेरिका लागेकी थिइन् ।
राष्ट्रिय टिममा फर्कन संघर्ष गरिरहेकी सिपोरा यस पटक भने धेरै खेल खेल्न पाउने लोभले न्यू डायमण्डबाट खेलिन् । किनकी आफुलाई लयमा फर्काउन सिपोरालाई धेरै खेलको आवश्यकता रहेको छ ।
'म अमेरिका जानु भन्दा अघि गण्डकीबाट खेलेका थिए । तर, हामी सधै तेस्रो स्थानको लागि खेल्नु पर्थ्यो । त्यसमा पनि हामी चौंथो हुन्थ्यौ । मैले पनि राम्रो गर्न सकेको थिएन । टिम राम्रो नहुँदा खेल देखिदैन,' सिपोराले थपिन्, 'गण्डकीको उत्कृष्ट तीन खेलाडी राष्ट्रिय टिमको क्याम्पमा रहेको थियो । क्याम्पका खेलाडी आउने थाहा पाएको भए म गण्डकीबाट खेल्ने थिए । उनीहरु र म हुँदा टिम राम्रो हुने रैछ भन्ने मनमा लागेको छ ।'
समूह चरणमा न्यू डायमण्डले एक खेल गुमाएको थियो । समूह चरणमा न्यू डायमण्ड पुलिससँग ३-२ को सेटमा पराजित भएको थियो । निकै रोमान्चक बनेको उक्त खेलमा पुलिसले न्यू डायमण्डलाई ३२-३०, २५-२२, १४-२५ ,२४-२६ र १५-५ को सेटमा पराजित गरेको थियो ।
तर, सेमिफाइनलमा गण्डकीविरुद्ध भने न्यू डायमण्डले २५–१८, २५–२० र २५–१९ को सहज जित निकाल्यो । प्रतियोगिताको सुरुवातमा टिमको तालमेल नमिलेको भएपनि सबै खेलाडीको उत्कृष्ट प्रदर्शनले टिम फाइनल पुगेको सिपोराले बताईन् ।
'ट्रेनिङ कम हुँदा हाम्रो तालमेल मिलेन । मैले १० दिन ट्रेनिङ गर्दा ५/६ दिन पानीले ट्रेनिङ भएन । यद्दपी टिम फाइनलमा पुगेको छ,' सिपोरा भन्छिन्, 'टिम राम्रो भएर नै फाइनल पुगेको हो । सबैले मेहेनेत गरेका छन् ।'
सन् २००६ मा श्रीलंकाको कोलम्बोमा सम्पन्न १० औं दक्षिण एसियाली खेलकुद (साग) बाट राष्ट्रिय टिममा डेब्यु गरेकी सिपोरा घुँडाको चोटपछि अधिकांस समय भलिबल बाहिर रहदै आएकी छिन् ।
१२ वर्षकै उमेरमा नेपाली टोलीमा डेब्यु गरेकी सिपोरा चोटबाट मुक्त भएपनि पुरानै लयमा फर्कन सकिरहेकी छैनन् ।
यस्तै सिपोराले आफु भलिबल खेल्न नेपाल फर्किएपछि सहज रुपमा खेल्ने वातावरण मिलाईदिएको कारण न्यू डायमण्डबाट खेलेको बताईन् ।
'मैले नेपाल आउछु र भलिबल खेल्छु भनेर सबैलाई जानकारी गराएको थिए । न्यू डायमण्डले सहज वातावरणले छाती फुलाएर स्वागत गर्नु भयो । जब कोच र टिमले पत्याउछ बल्ल खेल्न सजिलो हुन्छ ।
एपीएफबाहेक अरु सबै टिमलाई जानकारी गराएको थिए । न्यू डायमण्डले हृदयबाट स्वागत गर्नुभयो । बहिनिहरुले पनि मलाई खेल्न सहज बनाईदिए,' सिपोराले भनिन् ।
पाँच महिना नेपाल बसाईमा सिपोराले अब सबै घरेलु प्रतियोगिता न्यू डायमण्डबाट खेल्ने छिन् ।
तस्बिर सौजन्य : भलिबल नेपाल/सुदर्शन रंजित
