नेपाली खेलाडीमा अनुभवको कमी - एबिङ

काठमाडौं । नेपाली राष्ट्रिय भलिबल टिमका मुख्य प्रशिक्षक हान एबिङले नेपाली खेलाडीमा अनुभवको कमी रहेको बताएका छन् ।

घरेलु कोर्टमा जारी एभिसी सेन्ट्रल जोन पुरुष भलिबल च्याम्पियनसिपमा पाँचौ स्थान हासिल गरेपछि बोल्दै प्रशिक्षक एबिङले नेपाली खेलाडीलाई अन्तराष्ट्रिय र ठुला प्रतियोगितामा अनुभवको कमी रहेको बताए ।

पाँचौं स्थानको लागि भएको प्ले अफमा अफगानिस्तानलाई ३-१ को सेटमा पराजित गर्दै नेपाल पाँचौं भएको थियो । खेलपछि बोल्दै डच प्रशिक्षक एबिङले नेपाली खेलाडी निकै क्षमतावान र मेहेनती भएपनि अनुभवको कमीले ठुला प्रतियोगितामा उत्कृष्ट प्रदर्शन गर्न नसकेको बताए ।

'हामीले यस्तो खेल नखेलेका कारण प्रतियोगितामा सोचे अनुरुप प्रदर्शन गर्न सकेनौं । हामीले हप्ताको ६ दिन अभ्यास गर्यौं, धेरै मेहनत गर्यौं । तर, यस्तो खेल कहिले खेलेका थिएनौं,' प्रशिक्षक एबिङले भने, 'खेलाडीमा राम्रो स्किल्स छ । मेहनत छ । तर, अनुभवको निकै कमी रहेको छ । यो कुरा हामीले सुधार गर्नुपर्छ । प्रतिस्पर्धात्मक खेल खेल्नु पर्छ । अभ्यासले मात्र अब पुग्दैन । अनुभव र प्रतिस्पर्धात्मक खेलको पनि अनुभव आवश्यक पर्छ ।'

प्रतियोगितामा नेपाल जितविहीन बन्दै समूह चरणबाट बाहिरिएको थियो । समूह 'ए' मा रहेको नेपालले समूह चरणमा किर्गीस्तान र माल्दिभ्ससँग ३-० को सोझो सेटमा हार व्यहोरेको थियो ।

दुई हार व्यहोरेपनि नेपालले समूहको तेस्रो हुँदै पाँचौं स्थानका लागि अफगानिस्तानसँग खेलेको थियो । अफगानिस्तानविरुद्धको जित नेपालको सान्त्वना जित हो । तर, प्रशिक्षक एबिङले नेपालले समूह चरणमा पनि उत्कृष्ट प्रदर्शन गरेपनि अनुभवको कमीले हार व्यहोरेको बताए ।

'प्रशिक्षकको अनुभवमा हेर्दा हामीले खेलेको पहिलो खेल निकै उत्कृष्ट थियो । किर्गीस्तानसँग हामीले राम्रो खेलेको हौँ । उनीहरु सानो उमेरबाट भलिबल खेल्छन त्यसैले उनीहरुको खेल माथिल्लो स्तरको छ ।  माल्दिभ्स निकै चतुर छ । उनीहरुले नआत्तिकन खेल खेले । तर, हामीले फोकस गुमाउन पुग्दा खेल हारेका थियौं,' प्रशिक्षक एबिङले भने ।

यस्तै प्रशिक्षक एबिङले अफगानिस्तानसँग खेलाडीले दबाबरहित खेलेको बताए । जसको कारण नेपालले जित निकाल्न सफल भएको उनको भनाई थियो ।

'पहिलो २ खेल हारेको कारण खेलाडीले दबाब महसुस गरिरहेका थिए ।  तर, मैले उनीहरुलाई दबाब नलिन भनेको थिए । जित सधै प्रदर्शनको आधारमा भर पर्छ,' प्रशिक्षक एबिङले थपे । 

यस्तै प्रशिक्षक एबिङले नेपालमा आयोजना हुने १३ औं सागमा उच्च प्रदर्शन गर्न धेरै अन्तराष्ट्रिय खेल खेल्न आवश्यक रहेको बताए । 

'प्रतियोगितामा राम्रो नतिजा ल्याउने हो भने यस्ता थुप्रै खेल खेल्न जरुरी छ ।  कहिले अन्य राष्ट्रलाई बोलाउने त कहिले आफै विदेश भ्रमणमा निस्कनु पर्छ,' एबिङले भने, 'सागमा पुन: माल्दिभ्ससंग खेल्नु छ । यस प्रतियोगितामा  हामीले सोझो सेटमा हारेका छौं तर सागमा कमसेकम प्रतिस्पर्धात्मक खेल खेल्नु पर्छ ।'

सेन्ट्रल जोनका लागि आएका प्रशिक्षक एबिङले नेपालको प्रदर्शनबाट गर्व गर्नु पर्ने समेत बताए । उनले नेपाली समर्थकहरुलाई यसरी नै सधै टिमको समर्थन गर्न अनुरोध समेत गरे ।  

'खेलमा जित खोज्नु भन्दा पनि प्रदर्शनलाई मध्यनजर गर्नु पर्छ । खेलाडीहरु निकै मेहनती छन् । भलिबलका लागि उनीहरु हरदम लागि परेका छन् । सबै जनाले खेलाडीलाई सहयोग गर्नुपर्छ,' एबिङले भने ।