माल्दिभ्सलाई हराउँदै उज्वेकिस्तान फाइनलमा

काठमाडौं । उज्वेकिस्तान एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगिताको फाइनलमा प्रवेश गरेको छ ।

बिहिबार भएको दोस्रो सेमिफाइनलमा माल्दिभ्सलाई ३-० को सोझो सेटमा पराजित गर्दै उज्वेकिस्तान उपाधि नजिक पुगेको हो ।

लगनखेलस्थित त्रिभुवन आर्मी क्लबको शारीरिक तालिम तथा प्रशिक्षण केन्द्रको कभर्डहलमा उज्वेकिस्तानले माल्दिभ्सलाई २५-२०, २५-१९  र २५-२१ को सेटमा पराजित गर्यो ।

अब उज्वेकिस्तानले उपाधिका लागि किर्गीस्तानको सामना गर्नेछ ।  फाइनल खेल शनिबार हुनेछ ।

बिहिबार नै भएको पहिलो सेमिफाइनलमा तुर्कमेनिस्तानलाई ३-० को सोझो सेटमा पराजित गर्दै किर्गीस्तानले फाइनलमा स्थान बनाएको थियो ।

अब माल्दिभ्सले भने तेस्रो स्थानका लागि शुक्रबार तुर्कमेनिस्तानसँग खेल्नेछ । यस्तै नेपालले पाँचौ स्थानका लागि अफगानिस्तानसँग खेल्नेछ ।