बंगलादेशलाई हराउँदै तुर्कमेनिस्तान सेमिफाइनलमा

काठमाडौं । तुर्कमेनिस्तान एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगिताको सेमिफाइनलमा प्रवेश गरेको छ । 

बुधबार भएको समूह चरणको अन्तिम खेलमा बंगलादेशलाई ३-१ को सेटमा पराजित गर्दै तुर्कमेनिस्तानले सेमिफाइनलमा स्थान बनाएको हो ।

लगनखेलस्थित त्रिभुवन आर्मी क्लबको शारीरिक तालिम तथा प्रशिक्षण केन्द्रको कभर्डहलमा तुर्कमेनिस्तानले बंगलादेशलाई २५-२२, २५-१६ र २७-२९ र २५-१६ को सेटले हराएर अन्तिम चारको यात्रा तय गरेको हो ।

जितसँगै समूह 'बी' को तुर्कमेनिस्तानले ३ खेलमा ४ अंक जोड्यो । र, तुर्कमेनिस्तान समूह उपविजेता बन्दै सेमिफाइनलमा पुगेको छ । यस समूहबाट उज्वेकिस्तान ९ अंक जोडेर समूह विजेता बन्दै सेमिफाइनल पुगेको छ ।

बंगलादेश भने प्रतियोगिताको समूह चरणबाट बाहिरिएको छ । यस्तै यस समूहबाट अफगानिस्तान पनि बाहिरिएको छ ।

तुर्कमेनिस्तान र बंगलादेशको खेलसँगै प्रतियोगिताको सेमिफाइनल समीकरण समेत पुरा भएको छ ।

अब सेमिफाइनलमा उज्वेकिस्तानले माल्दिभ्ससँग खेल्नेछ । यस्तै तुर्कमेनिस्तानले किर्गिस्तानसँग खेल्नेछ ।

यस्तै नेपालले पाँचौं स्थानका लागि अफगानिस्तानसँग खेल्ने भएको छ ।