काठमाडौं । नेपाली राष्ट्रिय पुरुष भलिबल टिमलाई प्रशिक्षण दिन नेदरल्याण्ड्सका प्रशिक्षक हान एबिङ नेपाल आईपुगेका छन् ।
प्रशिक्षक एबिङ बुधबार विहान नेपाल आईपुगेका हुन् । प्रशिक्षक एबिङलाई नेपाल भलिबल संघका महासचिव जितेन्द्र चन्द लगायतले स्वागत गरेका थिए ।
नेपालमा आयोजना हुन लागेको एसियन भलिबल कन्फेडेरेसन (एभिसी) सेन्ट्रल जोन सिनियर पुरुष भलिबल प्रतियोगिताका लागि डच प्रशिक्षक एबिङ नेपाल आएका हुन् । प्रशिक्षक एबिङले बिहिबारबाट नेपाली टोलीलाई प्रशिक्षण दिने छन् ।
अन्तराष्ट्रिय भलिबल महासंघ (एफआईभीभी) ले प्रशिक्षक एबिङलाई नेपाल पठाएको हो । प्रशिक्षक एबिङले नेपाली टोलीलाई तीन महिना प्रशिक्षण दिने छन् । प्रशिक्षक एबिङको सम्पुर्ण खर्च एफआईभीभीले व्यहोर्ने छ ।
प्रशिक्षक एबिङले नेदरल्याण्डको पुरुष यू-२१ र जर्मनीको महिला यू-२० टिमको मुख्य प्रशिक्षक भएर काम गरिसकेका छन् ।
एसियन भलिबल संघको संयोजनमा आयोजना हुने सेन्ट्रल जोनमा नेपालसहित बंगलादेश, माल्दिभ्स, अफगानिस्तान, किर्गिस्तान, तुर्किमिनिस्तान र उज्वेकिस्तानसहित ७ टोलीले प्रतिस्पर्धा गर्नेछन् ।
प्रतियोगिता साउन ३२ देखि भदौ ८ गतेसम्म संचालन हुनेछ । प्रतियोगिताको लागि नेपालले मंगलबारबाट क्लोज क्याम सुरु गरेको छ । क्याम्पमा २५ खेलाडी बोलाईएको छ ।
