काठमाडौं । अखिल नेपाल फुटबल संघ एन्फाले मोफसलमा सञ्चालन हुने फुटबल प्रतियोगिताको वर्गिकरण मापदण्ड तयार गरेको छ । मोफसलका प्रतियोगितालाई थप व्यवस्थित बनाउन भन्दै एन्फाले स्तर निर्धारण समिति गठन गरेर प्रीतयोगिाको वर्गिकरण समेत गरेको छ ।
स्तर निर्धारण समितिले मोफसलमा नकआउट फुटबल प्रतियोगिता सञ्चालन गर्दै आएका आयोजकको सुझावका आधारमा प्रतियोगिता वर्गिकरणको मापदण्ड तयार गरेको हो ।
समितिले प्रतियोगिता हुने स्थान, खेल मैदानको अवस्था, सुरक्षा व्यवस्था, सहभागी टिमको संख्या, सहभागी टिमको स्तर, बिदेशी टिमको सहभागीता, प्राविधिक जनशक्तिको प्रयोग, प्रतियोगिता व्यवस्थापन, पुरस्कार राशी, मेडिकल सुविधा, प्रतियोगिताको निश्पक्षता, ईमान्दारीता र पारदर्शीताका आधारमा मोफसलका प्रतियोगितालाई तीन तहमा वर्गिकरण गरेको छ ।
एन्फाले तोकेको मापदण्ड अनुसार प्रतियोगिता आयोजना गर्न रंगशाला वा स्तरीय खेल मैदान व्यवस्थीत तरिकाले तारवार गरि न्युनतम एक हजार दर्शक क्षमताको स्थायी वा अस्थायी प्याराफिट हुनुपर्ने छ ।
सुरक्षाको दृष्टिकोणले मैदानमा व्यवस्थित तवरले तारवार जाली राखी घाँसे मैदान वा आर्टिफिसियल टफ मैदानमा मात्र प्रतियोगिता खेलाउन पाईनेछ ।
यस्तै, 'क' वर्गको प्रतियोगिता हुन कम्तिमा १० वटा टिमको सहभागीता हुनुपर्ने र जसमा कम्तिमा ६ वटा ए डिभिजन क्लब, दुई विदेशी क्लब र जिल्लामा दर्ता भएको टिम हुनुपर्ने मापदण्ड तोकिएको छ ।
'ख' वर्गको प्रतियोगिता हुन कम्तिमा १० वटा टिमको सहभागीता हुनुपर्ने र जसमा कम्तीमा ६ वटा ए डिभिजन क्लब, एक विदेशी क्लब र जिल्लामा दर्ता भएको टिम हुनुपर्ने उल्लेख छ ।
यस्तै, 'ग' वर्गको प्रतियोगिता हुन कम्तीमा ८ वटा टिम सहभागी हुनुपर्ने, कम्तीमा ४ ए डिभिजन मान्यता क्लब हुनुपर्ने र जिल्लामा दर्ता भएका क्लब र टिम हुनुपर्ने मापदण्ड तोकिएको छ ।
यस्तै प्रतियोगितामा आवश्यक प्राविधिक जनशक्ति एन्फाको प्रतियोगिता समितिको सिफारिसमा संघले मनोनयन मापदण्ड वर्गिकरण मस्यौदामा उल्लेख छ ।
अब आयोजकले एन्फाबाट प्रतियोगिता नियमावली स्विकृत गराई संघमा दर्ता भएका खेलाडी मात्र गोल्डकपमा खेलाउन पाउनेछन् ।
प्रतियोगिता सञ्चालन गर्दा सम्बन्धित जिल्ला फुटबल संघमा दर्ता शुल्क वापत 'क' वर्गको प्रतियोगिताका लागि २५ हजार, 'ख' वर्गका लागि १५ हजार र 'ग' वर्गका लागि १० हजार रुपैयाँ तिर्नुपर्नेछ ।
एन्फाले अब प्रतियोगितामा लाईसेन्स प्राप्त प्रशिक्षकको प्राविधिक समुहको व्यवस्था समेत अनिवार्य गरेको छ ।
यस्तै प्रतियोगितामा सहभागी टिमलाई आवश्यक प्रशिक्षण खेल मैदान, सुरक्षा, चेन्जिङ रुम, प्लेयर बक्स, औषधि उपचारको व्यवस्था, एम्बुलेन्सको व्यवस्था, खेलाडी र अफिसियलको वीमा व्यवस्था र दर्शकका लागि व्यवस्थित ट्वाईलेटको ब्यवस्था अनिवार्य गरिएको छ ।
यस्तै सहभागी टिमलाई आयोजकले यातायात व्यवस्था सहित थप १० हजार उपलब्ध गराउनुपर्नेछ । सहभागी टिमका लागि प्रतियोगिताको दिन र प्रशिक्षणको दिन यातायात सुविधा आयोजकले अनिवार्य रुपमा व्यवस्था गर्नुपर्ने मस्यौदामा उल्लेख छ ।
.JPG)
यस्तै 'क' वर्गको प्रतियोगिताकालागि २२ खेलाडी सहित २७ जनालाई आयोजकले खाना, खाजा र बसोबासको व्यवस्था गर्नुपर्नेछ ।
'ख' वर्गका लागि २० खेलाडी सहित २५ जना र 'ग' वर्गका लागि १८ जना खेलाडी सहित २३ जनालाई सेवा सुविधा आयोजकले उपलब्ध गराउनुपर्नेछ ।
त्यस्तै, 'क' वर्गको प्रतियोगिताको पुरस्कार राशी कम्तीमा दश लाख, ख वर्गको कम्तिमा ८ लाख र ग वर्गको कम्तिमा ६ लाख रुपैयाँ माथि हुनुपर्ने निर्धारण गरिएको छ ।
'क' वर्गको प्रतियोगिता आयोजकले खेलाडी र अफिसियललाई दैनिक भत्ता वापत कम्तीमा १५ सय, 'ख' वर्गले कम्तिमा १३ सय र 'ग' वर्गको प्रतियोगिता आयोजकले कम्तिमा ११ सय रुपैयाँ उपलब्ध गराउनुपर्नेछ ।
सहभागी टिमले पाउने म्याच मनीको बिषयमा क्लब र आयोजकबीच सम्झौता हुनुपर्ने र टिम ईन्ट्री अगावै सेवा र सुविधा सम्बन्धि पत्र क्लबलाई उपलब्ध गराउनुपर्ने उल्लेख छ ।
यस्तै, रेफ्री र रेफ्री एसेसर तथा म्याच कमिस्नरको भत्ता एन्फाको नियमानुसार उपलब्ध गराउनुपर्ने प्रावधान समेत समावेश गरिएको छ ।
प्रतियोगिताको म्याच रिपोर्ट, आर्थिक प्रतिवेदन प्रतियोगिता सकिएको २ महिना भित्र एन्फामा बुझाउनुपर्ने नियम बनाईएको छ ।
पाँचौ संस्करण सम्पन्न भएको प्रतियोगितालाई 'क' वर्ग, तेस्रो संस्करण सकिएको प्रतियोगितालाई 'ख' वर्ग र अन्य प्रतियोगितालाई 'ग' वर्गमा वर्गिकरण गरिएको छ ।
प्रतियोगिता नियमित र व्यवस्थित तरिकाले सञ्चालन भए नभएको अनुगमन गरी मुल्याङ्कनका आधारमा वर्गिकरण तलमाथि हुने एन्फाले जनाएको छ । नयाँ नियम अनुसार अब एक क्लबले महिनामा बढीमा तीन वटा मात्र प्रतियोगिता खेल्न पाउनेछन् ।
समितिले तयार गरेको प्रतिवेदनलाई एन्फाको कार्यसमिति बैठकले समेत पारित गरेको छ ।
