राष्ट्रिय खुल्ला भलिबलको उपाधि एपीएफलाई

काठमाडौं । विभागीय टिम एपीएफले सातौं संस्करणको सशस्त्र प्रहरी बल महानिरीक्षक महिला राष्ट्रिय खुल्ला भलिबल प्रतियोगिताको उपाधि जितेको छ ।

शुक्रबार घरेलु मैदानमा भएको खेलमा एपीएफले विद्यालयस्तरीय टिम न्यु डायमण्डलाई ३–० को सोझो सेटमा हराएको हो ।

उपाधिसंगै एपीएफले २ लाख ५० हजार रुपैयाँ प्राप्त गर्यो । उपविजेता न्यु डायमण्डले १ लाख २५ हजार रुपैयाँमा चित्त बुझायो ।

न्यु डायमण्डलाई सहजै सिकार बनाउने क्रममा एपीएफले २५–१२, २५–११ र २५–११ को सेटमा जित दर्ता गर्यो ।

यो संगै एपीएफको महिला टिमले बर्षको दसौ उपाधि हात पार्न सफल भएको छ ।

तेस्रो स्थानको खेलमा पुलिस विजयी बन्यो । पुलिसले त्रिभुवन आर्मी क्लबलाई ३–२ को सेटमा पराजित गर्यो ।

पहिलो सेट २५–१८ ले जितेको पुलिसले दोस्रो र तेस्रो सेट लगातार २५–१७ र २५–१३ ले गुमाएको थियो । त्यसपछि खेलमा उत्कृष्ट पुनरागमन गर्दै पुलिसले २५–२३ र १५–१३ सेटको जित निकाल्दै तेस्रो स्थान हात पारेको हो ।

तेस्रो बनेको पुलिसले ५० हजार रुपैयाँ प्राप्त गर्यो ।

एपीएफले यस बर्ष जितेकाे उपाधि :

शेर बहादुर स्मृति – बैशाख

सभामुख कप पाेखरा – बैशाख

सभामुख कप राेल्पा – जेठ 

आरवीवी एनभीए लिग – साउन

तिज कप – भदौ

२२ औँ राष्ट्रिय प्रधानसेनापति कप – असोज

दोस्रो होङ्गवान्जी न्यू डाइमन्ड च्याम्पियनसिप – पुष

१४ औँ ढोरपाटन लिग – माघ

दिदि बहिनी कप – फागुन

सशस्त्र प्रहरी बल महानिरीक्षक भलिवल - चैत