एपीएफ र न्यु डायमण्ड फाइलनमा भिड्ने

काठमाडौं । सातौं संस्करणको सशस्त्र प्रहरी बल महानिरीक्षक महिला राष्ट्रिय खुल्ला भलिबल प्रतियोगिताको उपाधिका लागि आयोजक एपीएफ र होङ्गबान्जी न्यु डायमण्ड एकेडेमी भिड्ने भएका छन् ।

बिहीबार बिहान हल्चोकस्थित एपीएफको कोर्टमा भएको खेलमा एपीएफले अर्काे विभागीय टिम नेपाल पुलिस र न्यु डायमण्डले अर्काे विभागीय त्रिभुवन आर्मीलाई समान ३–१ सेटले पराजित गर्दै उपाधि भिडन्त पक्का गरेका हुन् ।

यसअघि पुसमा भएको दोस्रो होङ्गवान्जी न्यु डायमण्ड कप र फागुनमा भएको दिदी बहिनी भलिबल कपको फाइनलमा दुबै क्लब प्रतिस्पर्धा गरेका थिए । दुवै खेलमा एपीएफ विजयी बनेको थियो ।

यस सिजन एपीएफको महिला भलिबल टिमले आठौ पटक फाइनल जितेको छ । एक प्रतियोगितामा मात्र उपविजेता बनेको छ ।

बिहिबार भएको रोमाञ्चक खेलमा एपीएफले पुलिसलाई २५–२३, २५–१७, १८–२५ र २५–१२ को सेटमा पराजित गर्यो ।

अर्को खेलमा न्यु डायमण्डले त्रिभुवन आर्मी क्लबलाई २५–२३, २३–२५, २५–२१ र २५–२० को सेटमा पराजित गर्यो ।

फाइनल खेल भोली (शुक्रबार) विहान हुनेछ ।

यस्तै तेस्रो स्थानको लागि नेपाल पुलिस र त्रिभुवन आर्मी क्लब भिड्नेछन् ।

प्रतियोगिताको विजेताले २ लाख ५० हजार रुपैयाँ प्राप्त गर्नेछ । उपविजेताले १ लाख २५ हजार रुपैयाँ र तेस्रो हुनेले ५० हजार रुपैयाँ पाउने छ ।

विधागततर्फ उत्कृष्ट स्पाईकर, उत्कृष्ट सर्भर, उत्कृष्ट डिफेन्स, उत्कृष्ट ब्लकर, उत्कृष्ट सेटर र उत्कृष्ट प्रशिक्षकले जनही ५ हजार पाउने छन् ।

महिला भलिबलमा एपीएफ २०७५

विजेता

शेर बहादुर स्मृति – बैशाख

सभामुख कप – बैशाख

आरवीवी एनभीए लिग – साउन

तिज कप – भदौ

२२ औँ राष्ट्रिय प्रधानसेनापति कप – असोज

दोस्रो होङ्गवान्जी न्यू डाइमन्ड च्याम्पियनसिप – पुष

१४ औँ ढोरपाटन लिग – माघ

दिदि बहिनी कप – फागुन

उपविजेता –

आदिअवादी लिग – असोज