एसियन बिच गेम्समा नेपालले कबड्डी र कुस्तीमा मात्रै सहभागिता जनाउने

काठमाडौं। चीनको सान्या सहरमा अर्को साता हुने एसियन बिच गेम्सको छैटौं संस्करणमा नेपालले दुई खेलमा मात्रै सहभागिता जनाउने भएको छ। पाँचौं संस्करणको तुलनामा चार खेल घटाएको हो।

नेपालले अप्रिल २२ देखि ३० सम्म हुने एसियन बिच गेम्स २०२६ मा कबड्डी र रेस्लिङ (कुस्ती) मा सहभागिता जनाउने पक्का भएको नेपाल ओलम्पिक कमिटी (जीवनराम श्रेष्ठ नेतृत्व) ले जनाएको छ। त्यसअनुसार नेपाली महिला कबड्डी टिमका ६ र कुस्तीका ३ गरी कुल ९ खेलाडीले सान्यामा प्रतिस्पर्धा गर्ने छन्।

रतिया राजवंशी प्रशिक्षक रहेको कबड्डी टिममा मानमती विष्ट, रविना चौधरी, अनुजा कुलुङ राई, सृजना कुमारी थारु, मिना नेपाली र नानुमाया पराजुली छन्। महिला कबड्डीमा ७ टिमले एसियन बिच गेम्स खेल्दै छन्। 

नेपालसहित थाइल्यान्ड, बंगलादेश र, चाइनिज ताइपेई समूह ‘बी’ मा छन्। अर्को समूहमा भारत, श्रीलंका र सिरिया छन्। समूहका शीर्ष दुई टिम सेमिफाइनलको लागि छनोट हुनेछन्।

नेपाली महिला कबड्डी टिमले चीनको हाङचोउमा तीन वर्षअघि भएको १९औं एसियन गेम्स २०२२ मा कांस्य पदक जितेको थियो। त्यसैले म्याटमा जितेको पदकलाई चिनियाँ भूमिमा बिचमा पनि निरन्तरता दिने आशा गरिएको छ।

कुस्तीतर्फ सुरेश चुनाराले पुरुष ८० केजी, त्रिलोकीप्रसाद यादवले ९० केजीमाथि र सुशीला चन्दले महिला ९० केजी स्पर्धामा सान्यामा आफ्नो कौशल देखाउने छन्। कुस्ती प्रशिक्षकमा मुमताज अली इद्रिस छन्।

एक दशकपछिको प्रतियोगिता

सन् २०१६ मा भियतनामको डानाङमा पाँचौं संस्करण भएयता एसियन बिच गेम्स पहिलोपल्ट आयोजना गर्न लागिएको हो। 

नोभेम्बर–डिसेम्बर २०२० मा तय गरिएको सान्या बिच गेम्सलाई कोभिड १९ महामारीको कारण ओलम्पिक काउन्सिल अफ एसिया (ओसीए) ले स्थगित गरेको थियो। त्यसपछि बल्ल आयोजनाको संघारमा आइपुगेको छ छैटौं संस्करण।

चीनले एसियन बिच गेम्स दोस्रोपल्ट आयोजना गर्न लागेको हो। यसअघि उसले हाइयाङ (सन् २०१२) मा तेस्रो संस्करण आयोजना गरेको थियो। यसपालि सान्यामा १९ खेलमा ९३ स्पर्धा समावेश गरिएको ओसीएले जनाएको छ।

पछिल्लोपल्ट डानाङमा नेपालले ६ खेलमा सहभागिता जनाएको थियो। बिच भलिबल, साम्बो, सेपाकताक्रो, बास्केटबल, बडी बिल्डिङ र कुराँसमा १९ खेलाडीले भियतनाम यात्रा गरेका थिए।

भगवती माझीको ऐतिहासिक पदक

इन्डोनेसियाको पर्यटकीय सहर बालीबाट सन् २००८ मा सुरु भएको एसियन बिच गेम्सका प्रत्येक संस्करणमा नेपाली खेलाडी सहभागी हुँदै आएका छन्। तर, पदक भने एकपल्ट मात्रै ल्याएको छ।

एसियन बिच गेम्सको १८ वर्षे इतिहासमा पदक जित्ने एक्लो नेपाली खेलाडी हुन् भगवती माझी। उनले फुकेट (थाइल्यान्ड÷२०१४) मा भएको चौथो संस्करणमा कांस्य पदक जितेकी थिइन्। 

उनले साम्बोमा महिलातर्फ ५२ केजी स्पर्धाबाट ऐतिहासिक पदक भित्र्याएकी थिइन्। उनी पाँचौ संस्करणमा अर्कै खेल (कुराँस) मा सहभागी भएकी थिइन्।