जितेर बाहिरिएको पाकिस्तान

काठमाडौं। आईसीसी टी–२० विश्वकपको सेमिफाइनलमा पुग्न ठूलो अन्तरले जित्नैपर्ने दबाबमा रहेको पाकिस्तानले पाँच रनको जित हात पारे पनि रनरेटका कारण अघिल्लो चरणमा स्थान बनाउन सकेन।

पललेकले अन्तर्राष्ट्रिय क्रिकेट रंगशालामा शनिबार भएको खेलमा श्रीलंकालाई ५ रनले हराए पनि पाकिस्तानको यात्रा सुपर ८ मै टुंगियो। टस जितेर पहिले फिल्डिङ रोजेको श्रीलंकाविरुद्ध पाकिस्तानले पहिले ब्याटिङ गर्दै २० ओभरमा २१२ रन बनाएको थियो।

सेमिफाइनलमा पुग्न पाकिस्तानलाई कम्तीमा ६४ रनको फराकिलो जित आवश्यक थियो। यस्तो दबाबबीच ओपनर साहिबजादा फरहान र फखर जमनले विस्फोटक सुरुआत दिलाए।

उनीहरूले पहिलो विकेटका लागि १७६ रनको साझेदारी गर्दै टी–२० विश्वकप इतिहासमा कुनै पनि विकेटका लागि सबैभन्दा ठूलो साझेदारीको कीर्तिमान बनाए।

फखर जमन ८४ रनमा आउट हुँदा शतकबाट चुके। साहिबजादा फरहानले ६० बलमा ठीक १०० रन पूरा गरे। उनले आफ्नो इनिङ्समा ९ चौका र ५ छक्का प्रहार गरे। फखरले ४२ बलमा ९ चौका र ४ छक्कासहित ८४ रन जोडे। तर, अन्त्यतिर ३४ रन जोड्दा पाकिस्तानले ८ विकेट गुमाएपछि टोली २१२ रनमै सीमित भयो।

जवाफमा ब्याटिङ गरेको श्रीलंकाले सुरुआत राम्रो गर्न सकेन। दोस्रो ओभरमै पाथुम निसाङ्क ३ रनमा आउट भए। त्यसपछि कामिल मिश्रारा २६, चरिथ असालंका २५, कमिन्दु मेन्डिस ३ र जेनेथ लियानागे ५ रनमा आउट हुँदा श्रीलंका दबाबमा परेको थियो।

एक छेउ सम्हालेर खेलेका पवन रथनायकेले ३७ बलमा ५८ रन बनाए। उनलाई १८औं ओभरमा शाहिन अफ्रिदीले आउट गरे। तर कप्तान दासुन शनाकाले अन्तिमसम्म संघर्ष जारी राखे। उनले ३१ बलमा अविजित ७६ रन बनाए।

अन्तिम ओभरमा श्रीलंकालाई जितका लागि २८ रन चाहिएको थियो। शाहिन अफ्रिदीको पहिलो बलमै चौका प्रहार गरेका शनाकाले त्यसपछि लगातार तीन छक्का हानेर खेल रोमाञ्चक बनाए। तर अन्तिम दुई बलमा ६ रन आवश्यक पर्दा दुवै बलमा रन लिन नसक्दा श्रीलंका २०७ रनमै रोकियो।

पाकिस्तानका लागि अबरार अहमदले ३ विकेट लिए भने शाहिन अफ्रिदी, नासिम शाह र उस्मान तारिकले समान १–१ विकेट लिए।