एनपीएल अक्टोबरमा, जय ट्रफी १० दिन !

काठमाडौं। नेपाल क्रिकेट संघ (क्यान) ले पुरुष, महिला, युवा तथा अफिसियल विकाससम्बन्धी सबै गतिविधि समेटिएको वार्षिक घरेलु क्रिकेट क्यालेन्डर सार्वजनिक गरेको छ।

सार्वजनिक क्यालेन्डरअनुसार वर्षभरि जिल्लादेखि प्रदेश र राष्ट्रिय तहसम्म विभिन्न प्रतियोगिता तथा तालिम कार्यक्रम सञ्चालन हुनेछन्।

क्यालेन्डरको सुरुआत जनवरीमा पुरुष प्रधानमन्त्री कपबाट हुनेछ। जसअन्तर्गत जनवरी ५ देखि २५ सम्म जिल्ला चरण र जनवरी २५ देखि फेब्रुअरी १० सम्म प्रदेश चरणका खेलहरू आयोजना गरिनेछन्। फेब्रुअरीमा पुरुष प्रधानमन्त्री कप प्रदेश चरण निरन्तरता पाउनेछ भने फेब्रुअरी १२ देखि २२ सम्म जय ट्रफी आयोजना हुनेछ। यही महिनामा राष्ट्रिय विद्यालय क्रिकेट च्याम्पियनसिपको जिल्ला चरण पनि सञ्चालन हुनेछ।

मार्च महिनामा पुरुष प्रधानमन्त्री कपको राष्ट्रिय चरण मार्च २८ देखि अप्रिल २२ सम्म सञ्चालन हुनेछ। यसै अवधिमा राष्ट्रिय विद्यालय क्रिकेट च्याम्पियनसिपको प्रदेश चरण तथा महिला प्रधानमन्त्री कपको जिल्ला चरण आयोजना गरिने क्यालेन्डरमा उल्लेख छ।

अप्रिल महिनामा महिला प्रधानमन्त्री कपको प्रदेश चरण, पुरुष यु–१९ राष्ट्रिय क्रिकेट प्रतियोगिताको जिल्ला तथा प्रदेश चरण र अन्य क्यान कार्यक्रमहरू सञ्चालन हुनेछन्।

मे महिनामा महिला प्रधानमन्त्री कपको राष्ट्रिय चरण मे २ देखि २० सम्म आयोजना हुनेछ। यसै महिना राष्ट्रिय विद्यालय क्रिकेट च्याम्पियनसिपको राष्ट्रिय चरण तथा यु–१९ राष्ट्रिय क्रिकेट प्रतियोगिता र क्यान युथ क्याम्प आयोजना हुनेछन्। जुन महिनामा सातै प्रदेशमा क्यान लेभल १ कोचिङ कोर्स सञ्चालन गरिनेछ भने जुन १५ देखि २५ सम्म राष्ट्रिय टी–२० च्याम्पियनसिप आयोजना गरिनेछ।

जुलाईमा क्यान लेभल २ कोचिङ कोर्स तथा पिच क्युरेटर कोर्स सञ्चालन हुनेछन्। अगस्ट महिनामा क्यान लेभल १ अम्पायरिङ कोर्स आयोजना गरिनेछ। सेप्टेम्बरदेखि अक्टोबरसम्म महिला लङ्गर फर्म्याट प्रतियोगिता आयोजना गर्ने प्रस्ताव गरिएको छ।

अक्टोबरदेखि नोभेम्बरसम्म नेपाल प्रिमियर लिग (एनपीएल) आयोजना हुने क्यालेन्डरमा समावेश गरिएको छ। अक्टोबरमै यु–१६ बोइज/ गर्ल्सको राष्ट्रिय विद्यालय क्रिकेट च्याम्पियनसिप, अन्तरविद्यालय तथा कलेजस्तरीय लङ्गर फर्म्याट प्रतियोगिता र क्षेत्रीय टुर्नामेन्टहरू आयोजना हुनेछन्। डिसेम्बर महिनामा पनि क्षेत्रीय टुर्नामेन्टहरू सञ्चालन हुनेछन्।

क्यानले सार्वजनिक गरेको यो वार्षिक क्यालेन्डरले नेपाली क्रिकेटको संरचनागत विकास, खेलाडी उत्पादन, महिला तथा युवा क्रिकेटको विस्तार र प्रशिक्षक तथा अम्पायर विकासमा महत्वपूर्ण भूमिका खेल्ने विश्वास गरिएको छ।