एन्फाले राष्ट्रिय लिगको प्रक्रिया अघि बढायो, पुस २५ देखि हुने

काठमाडौं। अखिल नेपाल फुटबल संघ (एन्फा) ले लामो विवाद र बहसपछि राष्ट्रिय लिग सञ्चालनको प्रक्रिया औपचारिक रूपमा अघि बढाएको छ।

एन्फा महासचिव किरण राईले आइतबार एन्फा प्रेसिडेन्ट लिगका विजेता र उपविजेतासहित चार क्लबलाई पत्र पठाउँदै लिगको तयारी सुरु गरेको पुष्टि गरेका हुन्।

राईले नवजागृति क्लब (बारा), चित्लाङ फुटबल क्लब (काठमाडौं), काँक्रेविहार युथ क्लब (सुर्खेत) र लालीगुराँस एसोसियसन क्लब (कास्की) लाई पत्र पठाउँदै पुस २५ गतेदेखि लिग सुरु हुने जानकारी गराएका छन्।

यसअघि भने पुस ९ गतेदेखि लिग गराउने तयारी थियो। तर, क्लब र खेलाडीको विरोधपछि मिति पछि सारिएको थियो।

लिगमा ‘ए’ डिभिजनका ६ टोली र प्रेसिडेन्ट लिगका शीर्ष चार टोलीले सहभागिता जनाउनेछन्। सहभागिता सुनिश्चिताको फाराम मंसिर १५ भित्र बुझाउन निर्देशन दिएको छ। सोमबार बस्ने एन्फा कार्यसमिति बैठकबाट लिगसम्बन्धी अन्तिम निर्णय आउने छ।

खेलाडीहरूको लामो आन्दोलनपछि राष्ट्रिय लिगको एक महिनापछि ‘ए’ डिभिजन लिग पनि गर्ने सहमति बनेको छ। शुक्रबार एन्फा हेडक्वार्टरमा बसेको कार्यदलको बैठकले राष्ट्रिय लिगपछि एक महिनाभित्र ‘ए’ डिभिजन लिग गर्ने निर्णय गरेको थियो।

खेलकुद मन्त्रालयको मध्यस्थतापछि एन्फा, क्लब र खेलाडी संघबीच कार्यदल गठन भएको थियो। एन्फाले तीन वर्षदेखि ‘ए’ डिभिजन लिग सञ्चालन गर्न सकेको छैन। त्यसैले घरेलु फुटबलको संरचना अस्तव्यस्त बनेको छ।

एन्फाको विधानले एक वर्षको चक्रभित्र राष्ट्रिय तथा डिभिजन लिग दुवै सम्पन्न गर्नुपर्ने व्यवस्था राखेको थियो। तर, आफ्नै विधानलाई अटेर गर्दा लिगको चक्र पूरा हुन सकेको छैन।