एन्फा अध्यक्षमा शाहीको उम्मेदवारी घोषणा

काठमाडौं। पूर्वराष्ट्रिय खेलाडी विराटजंघ शाहीले अखिल नेपाल फुटबल संघ (एन्फा) को अध्यक्षमा उम्मेदवारी घोषणा गरेका छन्।

उनी एन्फाका उपाध्यक्ष हुन्। फुटबलमा बेथिति रहेको आरोप लगाउँदै उनले आइतबार आफ्नो उम्मेदवारी घोषणा गरेका हुन्।

‘मैदानबाट पूरा देशलाई जोड्ने फुटबल आज आफैंमा थुप्रै गुटमा विभाजित छ। कोही कसैको अस्तित्व स्वीकार्न तयार छैनन्। मैदानमा फुटबल छैन। घरेलु लिगको संरचना अस्तव्यस्त छ। खेल्न नपाएर विदेश जाने खेलाडीको एयरपोर्टमा लर्को लाग्न थालेको धेरै भइसक्य । देशमा फुटबल नहुँदा खेलाडी मात्र होइन, प्रशिक्षक, रेफ्री र अन्य सरोकारवालाहरू पनि विदेश उड्ने क्रम प्रत्येक दिन बढ्दो छ। अन्तर्राष्ट्रिय प्रतियोगिताहरुमा नेपालको सहभागिता अब हार्नका लागि मात्र जस्तो हुन थालिसक्यो। नयाँ पुस्ताले फुटबलमा कुनै क्रेज र आशा देख्न छोडिसक्यो। समर्थकहरुले फुटबलको चासो लिन छोडिसके। यही पीडादायी यथार्थका बीच मेरो खेलाडी मन चुप लागेर बस्न मानिरहेको छैन। त्यसैले आगामी निर्वाचनमा अध्यक्ष पदका लागि आफ्नो उम्मेदवारी घोषणा गर्दछु,’ उनी भन्छन्।

अब पनि नेपाली फुटबललाई यी सबै विद्यमान बेथिति र विसंगतिबाट मुक्त नगर्ने हो भने नेपालमा फुटबल इतिहासको पानामा सीमित हुने उनले बताएका छन्।

सुशासन स्थापना गर्दै नेपाली फुटबलको ओरालो लागेको यात्रालाई रोक्न र यसको गुमेको गरिमा फर्काउन इमान्दार र सक्षम नेतृत्व पहिलो आवश्यकता रहेको उनले बताएका छन्। नेपाली फुटबलको यही आवश्यकता पूर्तिका लागि आफूले उम्मेदवारी घोषणा गरेको उनले बताए।