फाइनलमा पाकिस्तान र बंगलादेशलाई कुरिरहेको भारत

काठमाडौं। भारतले एसिया कप टी–२० को सुपर फोमा बंगलादेशलाई ४१ रनले पराजित गर्दै फाइनलमा स्थान सुरक्षित गरेको छ।

१६९ रनको लक्ष्य पछ्याउने क्रममा कप्तान जाकेर अलीको टोली १९.३ ओभरमा १२७ रनमा अलआउट भयो। यससँगै श्रीलंका प्रतियोगिताबाट बाहिरिएको छ भने पाकिस्तान–बंगलादेश खेल अब अप्रत्यक्ष सेमिफाइनल बन्न पुगेको छ।

त्यसको विजेता टोलीले २८ सेप्टेम्बरमा भारतसँग उपाधिका लागि खेल्नेछ। बंगलादेशका लागि सैफ हसनले मात्र उत्कृष्ट प्रदर्शन गर्न सके।

उनले ५१ बलमा ६९ रन बनाए। तर, अन्य ब्याटरको प्रदर्शन निराशाजनक रह्यो। दोस्रो ओभरमै तन्जिद तमिम आउट भए पनि सैफ र इमनले पावरप्लेमा ४४ रनको राम्रो सुरुआत दिलाए। तर, त्यसपछि इमन, तौहीद हृदय, शमिम हसन र कप्तान जाकेर छोटो अन्तरालमा आउट भएपछि टोली दबाबमा पर्‍यो।

१९ बलमा २१ रन बनाएका इमन छक्का प्रहार गर्ने क्रममा क्याच आउट भए। तौहीद हृदयले १० बलमा ७ रन मात्रै बनाए। माथिल्लो अर्डरमा आएका शमिम तीन बलमै शून्य रनमा बोल्ड भए। श्रीलंकाविरुद्ध विजयी नायक बनेका सैफले भने लगातार प्रहार गर्दै ३६ बलमा अर्धशतक पूरा गरे।

तर, अन्तिम चरणमा पनि बंगलादेशको ब्याटिङ ध्वस्त भयो। जाकेर रनआउट भए भने सैफउद्दिन ७ बलमा ४ रनमा आउट भए। १७औं ओभरमा कुलदीप यादवले लगातार दुई विकेट लिएर भारतलाई बलियो स्थितिमा पुर्‍याए। त्यसै ओभरमा तीनपटक जीवन पाए पनि अन्ततः सैफ ५१ बलमा ६९ रनमा आउट भए।

अन्तिम १६ बलमा ५३ रन आवश्यक भएको अवस्थामा बंगलादेशको जितको आशा टुटिसकेको थियो। बाँकी १३ बलमै टोली अलआउट हुँदै ११ रन मात्र थप्न सक्यो।

भारतका लागि कुलदीप यादवले ३ विकेट लिए भने जसप्रीत बुमराह र बरुण चक्रवर्तीले २–२ विकेट हात पारे। अक्षर पटेल र तिलक वर्माले १–१ विकेट लिए।