ह्याट्रिक म्यान केन

काठमाडौं। फेरि उही खेलाडी। बायर्न म्युनिखका स्टार स्ट्राइकर ह्यारी केनले शनिबार दोस्रो पटक सिजनको ह्याट्रिक पूरा गर्दै होफेनहाइमविरुद्ध ४–१ को जित दिलाएका छन्। यससँगै बायर्नले चार राउन्डपछि सबैभन्दा उत्कृष्ट बुन्डेसलिगा सुरुआत गर्दै कीर्तिमान बनाएको छ।

इङ्ल्यान्डका कप्तान केनले पहिलो हाफमा एक गोल गरे। दोस्रो हाफमा दुई पेनाल्टीमा गोल गर्दै ह्याट्रिक पूरा गरे। योसँगै उनले आफ्नो कुल गोल संख्या १२ (सबै प्रतियोगितामा ६ खेलमा) पुर्‍याएका छन्। जर्मन सुपरकपसहित ७ खेलमा उनका कुल गोल संख्या १३ पुगेको छ।

केनको अर्को ह्याट्रिक बुन्डेसलिगा सिजनको पहिलो खेलमा लेइप्जिगविरुद्ध ६–० को जितमा थियो। बायर्नले चार राउन्डपछि १२ अंक र १५ भन्दा बढी गोल अन्तरसहितको प्रदर्शन गर्दै बुन्डेसलिगा सुरु भएदेखि (१९६३) सबैभन्दा उत्कृष्ट सुरुआत गरेको छ।

बायर्नका प्रशिक्षक भिन्सेन्ट कोम्पनीले बुधबार च्याम्पियन्स लिगमा चेल्सीलाई ३–१ ले पराजित गरेको टोलीबाट पाँच खेलाडी परिवर्तन गरेका थिए। त्यस खेलमा केनले दुई गोल गरेका थिए।

चेल्सीबाट बायर्नमा आएपछि निकोलेस ज्याक्सनले पहिलोपल्ट सुरुआती ११ मा स्थान बनाए। १७ वर्षे लेनार्ट कार्लले बुन्डेसलिगामा पहिलो खेल खेल्दै टोलीलाई बलियो प्रदर्शन दिलाए।

होफेनहाइमका फिसनिक अस्लानीले मात्र पोस्टमा प्रहार गरे। बायर्नका गोअर म्यानुएल न्युएरको ब्याक पासमा बल सोझै उनीसामु पुगेको थियो। होफेनहाइम राम्रो खेलेको देखिन्थ्यो, तर कार्लको कोर्नरमा केनले नजिकको पोस्टमा गोल गर्दै ४४ औं मिनेटमा बायर्नलाई ब्रेक थ्रु दिलाए।

दोस्रो हाफमा केनले पेनाल्टीमा गोल गर्दै अग्रता २–० बनाएका थिए। माइकल ओलिसे फाउल भएपछि फेरि पेनाल्टीमा गोल गर्दै ह्याट्रिक पूरा गरे।

होफेनहाइमका भ्लादिमिर कौफलले फ्रीकिकबाट प्रहार गर्दै सान्त्वना गोल फर्काए। उनको प्रहार बायर्नका सब्स्टिच्युट जोशुवा किमिचलाई लाग्दै डिफ्लेक्सन भएको थियो।

अन्त्यमा बायर्नका सब्स्टिच्युट सर्ज ग्नाब्रीले स्टपेज टाइममा साँघुरो कोणबाट गोल गर्दै स्कोर पूरा गरे। बायर्नले आफ्नो आक्रामक सुरुआत जारी राख्दै बुन्डेसलिगामा उपाधि दाबेदारीलाई थप मजबुत बनाएको छ।