मियामी अन्तिम १६ मा, क्वार्टरफाइनल पुग्न पिएसजीसँग खेल्ने

काठमाडौं। ब्राजिलियन क्लब पाल्मेइरासले २ गोलले पछि परेको अवस्था उल्टाउँदै इन्टर मियामीसँग रोमाञ्चक बराबरी खेलेको छ। हार्ड रक स्टेडियममा भएको यस खेलमा दुवै टिम २–२ को बराबरीमा रोकिए पनि क्लब विश्वकपको अन्तिम १६ मा प्रवेश गर्न सफल भए।

दुवै टोलीले समान ४ अंक पुर्‍याए। इन्टर मियामीले लामो समयसम्म खेलमा अग्रता लिएको थियो। टाडेओ अल्लेन्डेले १६औं मिनेटमा गोल गर्दै मियामीलाई अग्रता दिलाए। त्यसपछि ६५औं मिनेटमा अनुभवी स्ट्राइकर लुइस सुआरेजले गोल गरेपछि मियामी २–० ले अघि थियो।

तर, ब्राजिलको ऐतिहासिक क्लब पाल्मेइरासले उत्कृष्ट पुनरागमन गर्‍यो। ८०औं मिनेटमा पाउलिन्होले गोल गर्दै खेलमा फर्काउने संकेत गरे। ८७औं मिनेटमा मौरिसियोले बराबरी गोल गरे।

लिओनल मेसीको बुधबार बिहान ३९औं जन्मदिन परेको थियो। खेलभरि सक्रिय देखिए पनि उनले गोल गर्न सकेनन्। पाल्मेइरास समूह एको विजेता बनेर ब्राजिलियन क्लब बोटाफोगोसँग अन्तिम १६ मा भिड्नेछ। इन्टर मियामीले समूह बीको विजेता पेरिस सेन्ट–जर्मेन (पिएसजी) सँग खेल्नेछ।