काठमाडौं । आयोजक द एक्सेल्सियर स्कुल र त्रिनेत्र सातौं एक्सेल्सियर कप अन्तर्गत फुटबलमा शुक्रबार च्याम्पियन बनेका छन् । एक्सेल्सियर सिनियर ब्वाइज तथा त्रिनेत्र जुनियर ब्वाइजमा च्याम्पियन बने ।
स्वयम्भूस्थित घरेलु मैदानमा भएको सिनियर फाइनलमा एक्सेल्सियले साइन मोडललाई ३–१ गोलले पराजित गर्यो । एक्सेल्सियरका निमेश गोतामेले २ तथा कर्मा निमा गुरुङले १ गोल गरे । साइनका रिदम आलेले सान्त्वना गोल गरे ।
जुनियर फाइनलमा त्रिनेत्रले ओराकललाई ४–३ गोलले हरायो । त्रिनेत्रका अनिश बुढा तथा किशन खड्काले समान २–२ गोल गरे । ओराकलका सुविन कर्माचार्यले २ तथा कृष गुरुङले १ गोल फर्काए ।
एक्सेल्सियरका निमेश गोतम तथा त्रिनेत्रका अनिश बुढा उत्कृष्ट खेलाडी घोषित भए । सिनियरमा एक्सेल्सियरका दिक्षान्त खड्का तथा जुनियरमा ओराकलका रोजन श्रेष्ठ उत्कृष्ट गोलरक्षक चुनिए । सिनियरमा काभ्या तथा जुनियरमा आर्या एकेडेमीले अनुशासित टिमको उपाधि हात पारे ।
यस्तै एक्सेल्सियर कपअन्तर्गत रेडिअन्ट पब्लिकले बास्केटबलमा दोहोरो उपाधि जितेको छ । रेडिअन्ट सिनियर र जुनियर ब्वाइजमा पहिलो भयो ।
सिनियर फाइनलमा रेडिअन्टले एलआरआईलाई ६२–५८ ले पराजित ग¥यो । रेडिअन्टका स्वयं कार्कीले २४ अंक जोडे । जुनियर फाइनलमा रेडिअन्टले ग्रिनफिल्डलाई ३१–१४ ले हरायो । विजेताका प्रस्तुत पौडेलले १२ स्कोर गरे ।
सिनियर गल्र्सको उपाधि भिडन्तमा स्वर्णिमले स्किब्सलाई ३५–१८ ले पाखा लगाउदै उपाधिमाथि कब्जा जमायो । स्वर्णिमकी मोहनी लोप्चनले ८ अंक जोडिन् ।
सिनियरको ब्वाइजमा रेडिअन्टका स्वयं कार्की र गल्र्समा स्वर्णिमकी मोहनी लोप्चन तथा जुनियर ब्वाइजमा रेडिअन्टका राज रोका ‘मोस्ट भेलुएबल प्लेयर’ घोषित भए । सिनियरको ब्वाइजमा मोक्सदा र गल्र्समा रुपिज तथा जुनियर ब्वाइजमा एभीएमले अनुशासित टिमको ट्रफी हात पारे ।
विजेतालाई नेपाल बास्केटबल संघका महासचिव नरेन्द्र थापा, डिएसपी सुधिरराज शाही, एक्सेल्सियरका प्रबन्ध निर्देशक राम बस्नेत, एक्सेल्सियरकी प्रिन्सिपल शितल राणालगायतले एक कार्यक्रमबीच पुरस्कृत गरे । माघ ९ गतेदेखि सुरु प्रतियोगिताको फुटबलतर्फ सिनियर र जुनियरमा समान १६–१६ टिम सहभागी थिए । बास्केटबलको सिनियर ब्वाइजमा १३ तथा सिनियर गल्र्स र जुनियर ब्वाइजमा समान १२–१२ टिमले भाग लिएका थिए ।
-1735220291.jpg)
